സ്വന്തം ലേഖകന്‍
തിരുവനന്തപുരം: ലൈഫ് പദ്ധതിയുടെ നിര്‍മാണത്തിനായി റെഡ് ക്രസന്റ് യൂണിടാക്കിന് നല്‍കിയ ആദ്യ ഗഡു തന്നെ കൈക്കൂലിയായി മറിച്ചു നല്‍കിയെന്നാണ് എന്‍ഫോഴ്‌സ്‌മെന്റ് കണ്ടെത്തല്‍. യൂണിടാക് ബില്‍ഡേഴ്‌സ് ഉടമ സന്തോഷ് ഈപ്പന്‍ കൈമാറിയ പണം ഡോളറായി സ്വപ്ന വിദേശത്തേക്ക് കടത്തിയെന്നാണ് അന്വേഷണ ഏജന്‍സികളുടെ നിഗമനം.
വടക്കാഞ്ചേരിയിലെ ലൈഫ് പദ്ധതിയുടെ നിര്‍മാണ കരാര്‍ ഉറപ്പിക്കാന്‍ സ്വപ്നയും യു.എ.ഇ കോണ്‍സുലേറ്റിലെ ഈജിപ്ഷ്യന്‍ പൗരന്‍ ഖാലിദും യൂണിടാക്കിനോട് ആവശ്യപ്പെട്ടത് 20 ശതമാനം കമ്മീഷനാണ്. ഇതു നല്‍കാമെന്ന് യൂണിടാക് സമ്മതിച്ച ശേഷമാണ് കരാര്‍ ഉറപ്പിച്ചത്. മുന്‍കൂറായി നല്‍കാന്‍ പണമില്ലെന്ന് യൂണിടെക് പ്രതിനിധികള്‍ അറിയിച്ചപ്പോള്‍ സ്വപ്ന തന്നെയാണ് പുതിയ നിര്‍ദേശം വച്ചത്.
നിര്‍മാണത്തിനായി റെഡ് ക്രസന്റ് യൂണിടാകിന് നല്‍കുന്ന ആദ്യ ഗഡു തന്നെ കമ്മീഷനായി നല്‍കണം എന്നായിരുന്നു നിര്‍ദേശം. ഇതു പ്രകാരം കരമന ആക്‌സിസ് ബാങ്കിലെ യൂണിടാക്കിന്റെ അക്കൗണ്ടിലേക്കെത്തിയ 3.2 കോടി രൂപ പിന്‍വലിച്ച് ഖാലിദിന് നല്‍കിയെന്നാണ് യൂണിടാക് എം.ഡി സന്തോഷ് ഈപ്പന്റെ മൊഴി. കൈക്കൂലി പണം സ്വപ്നയും സരിത്തും ചേര്‍ന്ന് വിവിധ സ്ഥാപനങ്ങള്‍ വഴി ഡോളറാക്കി മാറ്റി. ഇതിന് കരമന ആക്‌സിസ് ബാങ്ക് മാനേജര്‍ ശേഷാദ്രിയുടെ സഹായം ലഭിച്ചുവെന്നാണ് സ്വപ്ന മൊഴി നല്‍കിയിരിക്കുന്നത്. പണം വിദേശ കറന്‍സികളാക്കി മാറ്റാന്‍ സഹായിച്ചില്ലെങ്കില്‍ അക്കൗണ്ട് പിന്‍വലിക്കുമെന്നും ഹൈദരാബാദില്‍ തുടങ്ങുന്ന കോണ്‍സുലേറ്റിന്റെ ഇടപാടുകള്‍ ബാങ്കിന് നല്‍കില്ലെന്നും സ്വപ്ന ഭീഷണിപ്പെടുത്തിതായി ശേഷാദ്രി അന്വേഷണ ഏജന്‍സികളോട് പറഞ്ഞു.
ആക്‌സിസ് ബാങ്കിലെ ഒരു മുന്‍ ജീവനക്കാരന്‍ മുഖേന കണ്ണൂമ്മൂലയില്‍ നടത്തിയിരുന്ന മൗറീസ് എന്ന സ്ഥാപനം മുഖേന കുറച്ചു പണം സ്വപ്ന വിദേശ കറന്‍സിയാക്കി മാറ്റിയെന്നാണ് കസ്റ്റംസിന്റെയും എന്‍ഫോഴ്‌സ്‌മെന്റിന്റേയും കണ്ടെത്തല്‍. കോണ്‍സുലേറ്റിന് സമീപം മണി എക്‌സ്‌ചേഞ്ച് സ്ഥാപനം നടത്തുന്ന പ്രവീണ്‍, മറ്റൊരു ഇടനിലക്കാരന്‍ അഖില്‍ എന്നിവര്‍ വഴിയും പണം മാറി. എല്ലാവരെയും അന്വേഷണ ഏജന്‍സികള്‍ വിശദമായി ചോദ്യം ചെയ്തു.
ഡോളറാക്കി മാറ്റിയ പണം നയതന്ത്ര ഉദ്യോഗസ്ഥരുടെ ബാഗിലൂടെയും വിദേശ യാത്രാവേളയിലും സ്വപ്ന കടത്തിയെന്നാണ് മൊഴികളില്‍ നിന്നും സാഹചര്യ തെളിവുകളില്‍ നിന്നും എന്‍ഫോഴ്‌സ്‌മെന്റിന് വ്യക്തമാകുന്നത്. അതിനിടെ യു.എ.ഇ കോണ്‍സുലേറ്റിലെ നിരവധി ഉദ്യോഗസ്ഥര്‍ തട്ടിപ്പില്‍ ഉള്‍പ്പെട്ടത് അതീവഗൗരവത്തോടെയാണ് അന്വേഷണ ഏജന്‍സികള്‍ കാണുന്നത്.