കൊല്ലം: സി.പി.എം തനിക്കെതിരേ നടത്തിയത് സ്വഭാവഹത്യയെന്ന് കൊല്ലം പാര്‍ലമെന്റ് മണ്ഡലം യു.ഡി.എഫ് സ്ഥാനാര്‍ഥി എന്‍.കെ പ്രേമചന്ദ്രന്‍. കൊല്ലം ക്രിസ്തുരാജ് ഹൈസ്‌കൂളില്‍ വോട്ട് രേഖപ്പെടുത്തിയ ശേഷം മാധ്യമപ്രവര്‍ത്തകരോട് സംസാരിക്കുകയായിരുന്നു അദ്ദേഹം.
താന്‍ ആര്‍.എസ്.എസ് ആണെന്നതടക്കമുള്ള പ്രചാരണങ്ങള്‍ ന്യൂനപക്ഷ സമൂഹങ്ങള്‍ക്കിടയില്‍ നടത്തിയത് തോമസ് ഐസക് അടക്കമുള്ള മൂന്ന് മുതിര്‍ന്ന നേതാക്കളാണ്. രാഷ്ട്രീയ വിവാദങ്ങള്‍ ഉണ്ടാകുന്നത് നല്ലതാണ്.

എന്നാല്‍, കൊല്ലത്ത് ഉണ്ടായത് രാഷ്ട്രീയ വിവാദങ്ങള്‍ ആയിരുന്നില്ല. തികച്ചും വ്യക്തികേന്ദ്രീകൃതമായിരുന്നു. സംസ്ഥാന സര്‍ക്കാരിന്റെ ഭരണനേട്ടങ്ങളെക്കുറിച്ചും കോട്ടങ്ങളെക്കുറിച്ചുമുള്ള ചര്‍ച്ചകള്‍ ഉണ്ടായില്ല. അഞ്ചുവര്‍ഷം എം.പിയായിരിക്കെ നടത്തിയ വികസന പ്രവര്‍ത്തനങ്ങളെക്കുറിച്ചുള്ള വിമര്‍ശനാത്മകമായ വിലയിരുത്തലോ സംവാദമോ ഉണ്ടായില്ല. വ്യക്തിഹത്യയിലൂടെ രാഷ്ട്രീയമായനേട്ടം കൊയ്യാമെന്ന് ഇവന്റ് മാനേജ്‌മെന്റ് കമ്പനികളുടെ സഹായത്തോടെ ഗവേഷണം നടത്തിയാണ് അവര്‍ പ്രചാരണം നടത്തിയത്. എന്നാല്‍, അതെല്ലാം തനിക്ക് ഗുണം ചെയ്‌തെന്നാണ് കരുതുന്നതെന്ന് പ്രേമചന്ദ്രന്‍ പറഞ്ഞു.