തിരുവനന്തപുരം: തൃശൂരില്‍ നിന്നും വ്യോമമാര്‍ഗം തിരുവനന്തപുരത്തെത്തി വോട്ടു ചെയ്യാമെന്നായിരുന്നു എന്‍.ഡി.എ സ്ഥാനാര്‍ത്ഥി സുരേഷ് ഗോപിയുടെ പദ്ധതി. പക്ഷേ എന്തു ചെയ്യാന്‍ അവസാന നിമിഷമായപ്പോള്‍ ഒന്നും കിട്ടിയില്ല. അങ്ങിനെ കാത്തുകാത്തു വച്ചൊരു വിലയേറിയ വോട്ട് പാഴായിപ്പോവുകയും ചെയ്തു.

ശാസ്തമംഗലം രാജാ കേശവദാസ് ഹയര്‍സെക്കന്ററി സ്‌കൂളിലെ ബൂത്തിലായിരുന്നു സുരേഷ് ഗോപിയുടെ വോട്ട്. രാവിലെ തൃശൂരിലെ പോളിങ് വിലയിരുത്തിയശേഷം വൈകുന്നേരത്തോടെ വ്യോമമാര്‍ഗം തിരുവനന്തപുരത്തെത്തി വോട്ടു ചെയ്യാമെന്നായിരുന്നു പദ്ധതി. എന്നാല്‍ വൈകുന്നേരത്തിനു മുമ്പ് തിരുവനന്തപുരത്തെത്തുന്ന വിധം കൊച്ചിയില്‍ നിന്നും വിമാനസര്‍വ്വീസ് ഉണ്ടായില്ല. അപ്പോള്‍ പിന്നെ യാത്ര ഹെലികോപ്റ്ററിലാക്കാമെന്ന് വച്ചു.

തെരഞ്ഞെടുപ്പ് പ്രചരണങ്ങള്‍ക്കായി ബി.ജെ.പി ഉപയോഗിച്ച ഹെലികോപ്ടറില്‍ പോകാമെന്നായിരുന്നു തീരുമാനം. എന്നാല്‍ ഈ ഹെലികോപ്ടര്‍ വോട്ടിങ് ദിവസം ഉപയോഗിക്കാന്‍ പാടില്ലെന്ന് തെരഞ്ഞെടുപ്പു കമ്മീഷന്‍ അറിയിച്ചു. അതോടെ മറ്റുവഴികള്‍ തേടി.

കല്ല്യാണ്‍ ഗ്രൂപ്പിന്റെ ഹെലികോപ്ടര്‍ ഉപയോഗിച്ച് തിരുവനന്തപുരത്തേക്ക് പോകാമെന്നായിരുന്നു അവസാനം തീരുമാനിച്ചത്. എന്നാല്‍ കോപ്ടര്‍ എത്തിയപ്പോഴും വൈകുന്നേരം അഞ്ചു മണി കഴിഞ്ഞു. അവിടെ നിന്നും തിരുവനന്തപുരത്തെത്തുമ്പോഴേക്കും പോളിങ് സമയം കഴിയുകയും ചെയ്യും. ഇതോടെ വോട്ടു ചെയ്യാനുള്ള മോഹം സുരേഷ് ഗോപിക്ക് ഉപേക്ഷിക്കേണ്ടി വന്നു.