എടച്ചേരി: തന്റെ അടുത്ത സുഹൃത്തായിരുന്ന ലീഡര്‍ കെ. കരുണാകരന്റെ മകന്‍ മുരളീധരന് നേരിട്ട് വോട്ട് ചെയ്യാന്‍ കഴിയാത്തതിലുള്ള പ്രയാസത്തിലാണ് മുന്‍ എം.എല്‍.എ പണാറത്ത് കുഞ്ഞിമുഹമ്മദ്. വീടിനടുത്തുള്ള എടച്ചേരി നോര്‍ത്ത് യു.പി സ്‌കൂളിലെ ഏഴാം നമ്പര്‍ ബൂത്തില്‍ മകന്റെയും യു.ഡി.എഫ് പ്രവര്‍ത്തകരുടെയും സഹായത്തോടെയാണ് പണാറത്ത് വോട്ട് ചെയ്യാനെത്തിയത്.
1956-ല്‍ ഹമീദലി ഷംനാട് നാദാപുരത്ത് മത്സരിച്ചപ്പോള്‍ ചെയ്ത വോട്ടാണ് പണാറത്തിന്റെ കന്നിവോട്ട്. ആ തെരഞ്ഞെടുപ്പില്‍ താന്‍ വോട്ട് ചെയ്ത സ്ഥാനാര്‍ഥി വിജയിച്ചുവെന്ന വാര്‍ത്ത കേട്ട നിമിഷം ഇപ്പോഴും മനസില്‍ നിറഞ്ഞു നില്‍ക്കുന്നു. ഇപ്രാവശ്യത്തെ വോട്ട് ഓപ്പണായി ചെയ്തതാണെങ്കിലും മുരളീധരന്‍ മാന്യമായ ഭൂരിപക്ഷത്തോടെ വിജയിക്കും എന്ന് തന്നെയാണ് തന്റെ പ്രതീക്ഷയെന്നും പണാറത്ത് പറഞ്ഞു. അവസാനമായി തന്റെ ഓപ്പണ്‍ വോട്ട് ചെയ്യാന്‍ പണാറത്ത് ഏല്‍പ്പിച്ചത് എടച്ചേരി പഞ്ചായത്ത് മുസ് ലിം ലീഗ് പ്രസിഡന്റായ ചുണ്ടയില്‍ മുഹമ്മദിനെയാണ്. മുസ്‌ലിം ലീഗിനെ നെഞ്ചോട് ചേര്‍ത്ത്, നീണ്ട അഞ്ച് പതിറ്റാണ്ടിലധികം പ്രവര്‍ത്തന രംഗത്ത് നിറഞ്ഞു നിന്ന പണാറത്ത് 1977 മുതല്‍ മേപ്പയ്യൂര്‍ നിയോജക മണ്ഡലത്തിലെ എം.എല്‍.എ ആയിരുന്നു. ജീവിതത്തിന്റെ സായംസന്ധ്യയിലും ലീഗിനോട് കാണിക്കുന്ന പ്രതിബദ്ധതയാണ് തന്റെ ഓപ്പണ്‍ വോട്ട് ലീഗ് ഭാരവാഹിയെക്കൊണ്ട് തന്നെ ചെയ്യിക്കുക വഴി പണാറത്ത് തെളിയിച്ചത്. കേരളത്തിലെ മണ്ഡലങ്ങളില്‍ വോട്ടിങ്ങിലുണ്ടായ വര്‍ധനവ് യു.ഡി.എഫിന്റെ വിജയത്തെയാണ് സൂചിപ്പിക്കുന്നതെന്നും കേന്ദ്രം ഭരിക്കുന്ന ഫാസിസ്റ്റ് സര്‍ക്കാരിനെ താഴെ ഇറക്കാനാകുമെന്നും അരനൂറ്റാണ്ടിലധികം കാലം രാഷ്ട്രീയ പ്രവര്‍ത്തന പാരമ്പര്യമുള്ള 84കാരനായ പണാറത്ത് കുഞ്ഞിമുഹമ്മദ് സുപ്രഭാതത്തോട് പറഞ്ഞു.