പെര്‍ള: പ്രളയബാധിതരെ സഹായിക്കുന്ന കാര്യത്തില്‍ എന്‍മകജെ പഞ്ചായത്തില്‍ ബി.ജെ.പിക്ക് നിസഹകരണം. പ്രളയദുരിത ബാധിതരുടെ കണ്ണീരൊപ്പുന്നതിനു വേണ്ടി തദ്ദേശസ്വയം ഭരണ സ്ഥാപനങ്ങളിലെ അംഗങ്ങളും ജീവനക്കാരും മുഖ്യമന്ത്രിയുടെ ദുരിതാശ്വാസ നിധിയിലേക്കു വിഭവസമാഹരണം നടത്തി നല്‍കണമെന്ന് ജില്ലാ കലക്ടറുടെ നിര്‍ദേശം ഉണ്ടായിരുന്നു.
ജില്ലയിലെ മറ്റു പഞ്ചായത്തുകള്‍ നിര്‍ദേശം നടപ്പാക്കുമ്പോള്‍ എന്‍മകജെ പഞ്ചായത്തിലെ ബി.ജെ.പി അംഗങ്ങള്‍ വിട്ടുനിന്നത് ചര്‍ച്ചയാകുന്നു. പ്രളയബാധിതരെ സഹായിക്കുന്നത് സംബന്ധിച്ച് കഴിഞ്ഞ ദിവസം പഞ്ചായത്ത് കോണ്‍ഫറന്‍സ് ഹാളില്‍ ചേര്‍ന്ന യോഗത്തില്‍ പഞ്ചായത്ത് പ്രസിഡന്റിന്റെ താല്‍ക്കാലിക ചുമതല വഹിക്കുന്ന വികസന സ്റ്റാന്റിങ് കമ്മിറ്റി ചെയര്‍പേഴ്‌സണ്‍ ജയശ്രീ കുലാല്‍ അധ്യക്ഷയായി.
യോഗത്തില്‍ യു.ഡി.എഫിലെ ഏഴ് അംഗങ്ങളില്‍ ആറുപേര്‍ ഹാജരായി. മുസ്‌ലിം ലീഗ് അംഗമായ സിദ്ദീഖ് വളമുഗര്‍ ചില സങ്കേതിക കാരണങ്ങളാല്‍ ഹാജരാകാന്‍ കഴിയില്ലെന്നും യോഗ തീരുമാനം അംഗീകരിക്കുമെന്നും അറിയിച്ചിരുന്നുവത്രെ.
അതേ സമയം, ബി.ജെ.പിയിലെ ഏഴ് മെമ്പര്‍മാരില്‍ മമത ജി. റൈയും ശശികലയും ഹാജരായില്ല. എല്‍.ഡി.എഫിലെ മൂന്ന് അംഗങ്ങളും ഹാജരായി. എന്നാല്‍ പ്രളയബാധിതര്‍ക്ക് സഹായം നല്‍കുന്നതിന് പഞ്ചായത്ത് അംഗങ്ങളും ജീവനക്കാരും കൈകോര്‍ക്കണമെന്ന് പറഞ്ഞപ്പോള്‍ ബി.ജെ.പി അംഗമായ രൂപവാണി ആര്‍. ഭട്ടിന്റെ നേതൃത്വത്തില്‍ നിസഹകരണ മനോഭാവം പുലര്‍ത്തുകയും പരസ്പര വിരുദ്ധമായ കാര്യങ്ങള്‍ പറഞ്ഞുകൊണ്ട് വാഗ്വാദത്തില്‍ കലാശിച്ചതായും പറയുന്നു.
ആഴ്ചകളോളമായി പഞ്ചായത്തില്‍ ഭരണസ്തംഭനമാണ് നിലനില്‍ക്കുന്നത്. വികസന മുരടിപ്പിനും നേരത്തെ പ്രസിഡന്റായിരുന്ന ബി.ജെ.പിയിലെ രൂപവാണിയുടെയും കെ. പുട്ടപ്പയുടെയും ഏകാധിപത്യ ഭരണത്തിനുമെതിരേ യു.ഡി.എഫ് അംഗങ്ങള്‍ നല്‍കിയ അവിശ്വാസ പ്രമേയത്തെ എല്‍. ഡി.എഫ് അനുകൂലിച്ചതോടെ ബി.ജെ.പിക്ക് പ്രസിഡന്റ്, വൈസ് പ്രസിഡന്റ് സ്ഥാനങ്ങള്‍ നഷ്ടപ്പെട്ടിരുന്നു.
പുതിയ പ്രസിഡന്റ്, വൈസ് പ്രസിഡന്റ് തെരഞ്ഞെടുപ്പ് തിയതി തെരഞ്ഞെടുപ്പ് കമ്മിഷന്‍ നിശ്ചയിച്ചിട്ടില്ല. അതുകൊണ്ടു തന്നെ വരും നാളുകളില്‍ ബി.ജെ.പിയുടെ നിസഹകരണം കുടൂതല്‍ ചര്‍ച്ചകള്‍ക്കു കാരണമാകും.