കല്‍പ്പറ്റ: വയനാട്ടിലെ പ്രമുഖരെല്ലാം ഉച്ചയ്ക്ക് മുന്‍പ് തന്നെ വോട്ട് രേഖപ്പെടുത്തി. രാജ്യസഭാംഗം എം.പി വീരേന്ദ്രകുമാര്‍ രാവിലെ 10.30ന് കല്‍പ്പറ്റ എസ്.കെ.എം.ജെ ഹയര്‍സെക്കന്‍ഡറി സ്‌കൂളില്‍ വോട്ട് രേഖപ്പെടുത്തി. സി.കെ ശശീന്ദ്രന്‍ എം.എല്‍.എ മുണ്ടേരി ഗവ. ഹയര്‍ സെക്കന്‍ഡറി സ്‌കൂളിലാണ് വോട്ട് രേഖപ്പെടുത്തിയത്. കുടുംബത്തോടൊപ്പം എത്തിയാണ് ശശീന്ദ്രന്‍ വോട്ട് ചെയ്തത്.
ലോക്താന്ത്രിക് ജനതാദള്‍ സംസ്ഥാന അധ്യക്ഷന്‍ എം.വി ശ്രേയാംസ്‌കുമാര്‍ കല്‍പ്പറ്റ എസ്.കെ.എം.ജെ സ്‌കൂളില്‍ വോട്ട് രേഖപ്പെടുത്തി. കുടുംബത്തോടൊപ്പം എത്തിയാണ് ശ്രേയാംസ്‌കുമാര്‍ വോട്ട് ചെയ്തത്.
ഐ.സി ബാലകൃഷ്ണന്‍ എം.എല്‍.എ വാളാട് ഗവ. ഹയര്‍സെക്കന്‍ഡറി സ്‌കൂളില്‍ 12ാം നമ്പര്‍ ബൂത്തില്‍ വോട്ട് രേഖപ്പെടുത്തി. മാനന്തവാടി എം.എല്‍.എ ഒ.ആര്‍ കേളു കാട്ടിക്കുളം എടയൂര്‍കുന്ന് 42ാം ബൂത്തിലും മുന്‍മന്ത്രി പി.കെ ജയലക്ഷ്മി വാളാട് എടത്തന ഗവ. ട്രൈബല്‍ സ്‌കൂളിലെ 10ാം നമ്പര്‍ ബൂത്തിലുമാണ് വോട്ട് ചെയ്തത്. സിവില്‍ സര്‍വീസ് പരീക്ഷ റാങ്ക് ജേതാവ് ശ്രീധന്യ സുരേഷ് ഇടിയംവയല്‍ ബൂത്തിലും വോട്ട് രേഖപ്പെടുത്തി.
സമസ്ത ജില്ലാ പ്രസിഡന്റ് കെ.ടി ഹംസ മുസ്‌ലിയാര്‍ ജി.എച്ച്.എസ്.എസ് തരിയോടിലും കേന്ദ്ര മുശാവറ അംഗം വി. മൂസക്കോയ മുസ്‌ലിയാര്‍ അഞ്ചുകുന്ന് ഗാന്ധി മെമ്മോറിയല്‍ സ്‌കൂളിലെ ആദ്യ വോട്ടറായും ജംഇയത്തുല്‍ മുഅല്ലിമീന്‍ സംസ്ഥാന ട്രഷറര്‍ എം.എം ഇമ്പിച്ചിക്കോയ മുസ്‌ലിയാര്‍ മടക്കിമല എല്‍.പി സ്‌കൂളിലും സുന്നി മഹല്ല് ഫെഡറേഷന്‍ സംസ്ഥാന സെക്രട്ടറി പിണങ്ങോട് അബൂബക്കര്‍ പിണങ്ങോട് ഡബ്ല്യു.ഒ.എച്ച്.എസ്.എസിലും എസ്.കെ.എസ്.എസ്.എഫ് സംസ്ഥാന വൈസ് പ്രസിഡന്റ് ശൗഖത്തലി വെള്ളമുണ്ട എ.യു.പി സ്‌കൂളിലും വോട്ട് രേഖപ്പെടുത്തി.
മുസ്‌ലിം യൂത്ത് ലീഗ് സംസ്ഥാന വൈസ് പ്രസിഡന്റ് പി. ഇസ്മയില്‍, എം.എസ്.എഫ് സംസ്ഥാന ജനറല്‍ സെക്രട്ടറി എം.പി നവാസ് എന്നിവര്‍ വിവിധ കേന്ദ്രങ്ങളിലായും സമ്മതിദാന അവകാശം വിനിയോഗിച്ചു.