കോഴിക്കോട്: ഉത്രാടത്തിനു വിയര്‍ത്തോടിയാല്‍ തിരുവോണം കെങ്കേമമാക്കാമെന്ന പഴമൊഴി അക്ഷരാര്‍ഥത്തില്‍ നെഞ്ചേറ്റുകയായിരുന്നു കോഴിക്കോട്ടുകാര്‍. ഉത്രാടപ്പാച്ചിലില്‍ ഇന്നലെ നഗരം വീര്‍പ്പുമുട്ടി. പ്രളയം കാരണം ദുരിതാശ്വാസ പ്രവര്‍ത്തനങ്ങളില്‍ മുഴുകിയവരും ക്യാംപുകളില്‍നിന്ന് വീടണഞ്ഞവരും ഇന്നലെയാണ് ഷോപ്പിങ്ങിനായി സമയം കണ്ടെത്തിയത്. വൈകിട്ടോടെ തിരക്ക് കൂടിവന്നു.
തെളിഞ്ഞ കാലാവസ്ഥയായതിനാല്‍ രാവിലെ മുതല്‍ മിഠായിത്തെരുവിലും മാനാഞ്ചിറയിലും പാവമണി റോഡിലും പാളയം മാര്‍ക്കറ്റിലും നല്ല തിരക്കായിരുന്നു. നഗരം പലപ്പോഴും ഗതാഗതക്കുരുക്കിലമരുകയും ചെയ്തു. കഴിഞ്ഞ ഒരാഴ്ചയായി കച്ചവടവും കാത്തു പ്രധാന കേന്ദ്രങ്ങളിലെല്ലാം സ്ഥാനം പിടിച്ച വഴിവാണിഭക്കാര്‍ക്കും ഇന്നലെ കച്ചവടം തകൃതിയായിരുന്നു. മഴയില്ലാതിരുന്നതും തെരുവുകച്ചവടക്കാര്‍ക്ക് അനുഗ്രഹമായി.
നഗരത്തിലെ വ്യാപാര സ്ഥാപനങ്ങളിലെല്ലാം വന്‍ തിരക്ക് അനുഭവപ്പെട്ടു. ഓണത്തോടനുബന്ധിച്ച് ആകര്‍ഷകമായ വിലക്കിഴിവും ഓഫറുകളും ഒരുക്കിയ വന്‍കിട ഷോപ്പിങ് മാളുകളും വലുതും ചെറുതുമായ ഷോറൂമുകളും ഓണം മേളകളും ഉപഭോക്താക്കളെക്കൊണ്ട് നിറഞ്ഞു. തുണിക്കടകളില്‍ റെക്കോര്‍ഡ് വില്‍പനയാണ് നടന്നത്. പുലര്‍െച്ച അഞ്ചോടെ സജീവമായ പാളയത്തെ പച്ചക്കറി വിപണിയും പൂക്കച്ചവടവും രാത്രിവരെ നീണ്ടു.
വൈകിട്ട് പാളയം മാര്‍ക്കറ്റില്‍ എത്തിപ്പെടാന്‍ ജനം പ്രയാസപ്പെട്ടു. സദ്യക്കുള്ള പച്ചക്കറികള്‍ വാങ്ങാനുള്ള തിരക്ക് പാളയം പച്ചക്കറി മാര്‍ക്കറ്റിലും പരിസരത്തുമായിരുന്നു. പൂവില്‍പനയുടെ അവസാന ദിവസമായ ഇന്നലെ പൂകച്ചവടക്കാര്‍ക്കും നല്ല കൊയ്ത്തായിരുന്നു. എത്ര വിലകൊടുത്തും പൂ വാങ്ങാന്‍ തിക്കും തിരക്കും കാണാമായിരുന്നു.
ഓണത്തിനു വൈവിധ്യമാര്‍ന്ന ഉല്‍പന്നങ്ങളുടെ വില്‍പനയ്ക്കായി ഏതാനും ദിവസം മുന്‍പ് ആരംഭിച്ച മേളകളിലും ഇന്നലെ തിരക്കനുഭവപ്പെട്ടു. ഹോര്‍ട്ടികോര്‍പ്, കുടുംബശ്രീയുടെ ഓണച്ചന്ത, കണ്‍സ്യൂമര്‍ ഫെഡിന്റെ സഹകരണ ഓണവിപണി, ഓണം കൈത്തറി എക്‌സ്‌പോ, ഓണം ബക്രീദ് ഖാദി മെഗാ എക്‌സ്‌പോ, ജില്ലാ ഖാദി ഗ്രാമ വ്യവസായ ഓഫിസിലെ ഖാദി ഓണം-ബക്രീദ് മേള, കൈരളി ഓണം ഫെയര്‍ എന്നിവിടങ്ങളിലെല്ലാം വന്‍ തിരക്കായിരുന്നു.
പ്രധാന മേളകളെല്ലാം തന്നെ ഇന്നലെ സമാപിച്ചു. മാനാഞ്ചിറ മുതല്‍ പാവമണി റോഡ് വരെ വഴിവാണിഭക്കാര്‍ കൈയടക്കി വച്ചിരിക്കുകയാണ്. വഴിയോരത്ത് 100 മുതല്‍ 2,000 രൂപ വരെയുള്ള വസ്ത്രങ്ങള്‍ വില്‍പനയ്ക്കുണ്ടായിരുന്നു.
ചുരിദാര്‍, സാരി, ഉടുപ്പുകള്‍, ടോപ്പുകള്‍ എന്നിവയൊക്കെ അധികമായി വിറ്റുപോയി. സ്ത്രീകള്‍ക്കും കുട്ടികള്‍ക്കുമുള്ള വൈവിധ്യമാര്‍ന്ന വസ്ത്രശേഖരവുമായാണ് കച്ചവടക്കാര്‍ എത്തിയിരുന്നത്.
ഷോപ്പിങ് മാളുകളിലും വലിയതോതില്‍ തിരക്കനുഭവപ്പെട്ടു. തിയറ്ററുകളിലും ബീച്ചിലും മാനാഞ്ചിറ സ്‌ക്വയറിലും സരോവരം ബയോപാര്‍ക്കിലും പതിവിലുമേറെ ആളുകള്‍ എത്തിയിരുന്നു. നിരീക്ഷണത്തിനും ഗതാഗത നിയന്ത്രണത്തിനുമുള്‍പ്പെടെ അധികമായി പൊലിസ് സംവിധാനവും നഗരത്തില്‍ വിന്യസിച്ചിട്ടുണ്ട്. തിരുവോണത്തലേന്ന് കുടുംബസമേതം ആളുകള്‍ ഷോപ്പിങ്ങിനിറങ്ങിയതോടെ നഗരത്തിലെ പ്രധാന റോഡുകളെല്ലാം ഗതാഗതക്കുരുക്കില്‍ നിശ്ചലമായി. നഗരത്തിലെ പ്രധാന റോഡുകളിലും നഗരത്തിലേക്ക് പ്രവേശിക്കുന്ന ഇടങ്ങളിലും ഏറെനേരം നീണ്ട ഗതാഗതസ്തംഭനമാണുണ്ടായത്.