മുക്കം: കാലവര്‍ഷക്കെടുതികളില്‍ സര്‍വതും നഷ്ടപ്പെട്ട് ദുരിതാശ്വാസ ക്യാംപുകളിലും ബന്ധുവീടുകളിലും മറ്റും കഴിയുന്നവര്‍ക്ക് സഹായഹസ്തവുമായി കൊച്ചു കലാകാരിയുടെ കാരിക്കേച്ചര്‍. കൊടിയത്തൂര്‍ പന്നിക്കോട് സ്വദേശി എം. റോഷ്‌നയാണ് നോര്‍ത്ത് കാരശ്ശേരി ബി.പി.എം ഹൈപ്പര്‍ മാര്‍ക്കറ്റില്‍ വച്ച് ഓരോരുത്തരുടെയും കാരിക്കേച്ചര്‍ വരച്ച് അതില്‍ നിന്ന് ലഭിച്ച വരുമാനം ദുരിതാശ്വാസ പ്രവര്‍ത്തനങ്ങള്‍ക്കായി മാറ്റിവച്ചത്.
വെറും അഞ്ച് മിനുട്ട് കൊണ്ട് തന്റെ മുന്നിലെത്തുന്ന ആരുടെയും കാരിക്കേച്ചര്‍ ഈ മിടുക്കി വരച്ചു നല്‍കും. 2015ല്‍ എറ്റവും വലിയ തെരഞ്ഞെടുപ്പ് പോസ്റ്റര്‍ തയാറാക്കി ലിംക ബുക്ക് ഓഫ് റെക്കോര്‍ഡിലും റോഷ്‌ന ഇടം പിടിച്ചിരുന്നു. ചാത്തമംഗലം ആര്‍.ഇ.സി ഗവ. ഹയര്‍ സെക്കന്‍ഡറി സ്‌കൂള്‍ എന്‍.എസ്.എസ് വളണ്ടിയറാണ് റോഷ്‌ന.
ദുരിതബാധിതര്‍ക്കായുള്ള കാരിക്കേച്ചര്‍ നിര്‍മാണം സിനിമ, സീരിയല്‍ താരം സൗപര്‍ണിക സുരേഷ് ഉദ്ഘാടനം ചെയ്തു. സ്‌കൂള്‍ പി.ടി.എ പ്രസിഡന്റ് സി.ടി കുഞ്ഞോയി അധ്യക്ഷനായി. എന്‍.എസ്.എസ് പ്രോഗ്രാം ഓഫിസര്‍ എന്‍.ടി കവിത, ശ്രീഷ്മ സുരേഷ്, പി.കെ സുധാകരന്‍, വി. മിത്യ സംസാരിച്ചു.