കോതമംഗലം: സംസ്ഥാനത്തുണ്ടായ മഹാ പ്രളയത്തിന്റെ ഭാഗമായി വെള്ളപ്പൊക്കത്തില്‍ വീടുകള്‍ നഷ്ടമായ കീരംപാറ പഞ്ചായത്തിലെ കൂരികുളം,പോത്തുപാറ,ചാരുപാറ, സൂരികുളം അടക്കമുള്ള പ്രദേശങ്ങള്‍ അന്റണി ജോണ്‍ എം.എല്‍.എ സന്ദര്‍ശിച്ചു.
പെരിയാര്‍വാലി ക്യാഷ്‌മെന്റ് ഏരിയയില്‍ പ്രസ്തുത പ്രദേശങ്ങളില്‍ താമസിച്ചിരുന്ന അമ്പതോളം വീടുകളാണ് വെള്ളപ്പൊക്കത്തിന്റെ ദുരിതം അനുഭവിക്കുന്നത്. ഇതില്‍ ഇരുപതോളം വീടുകള്‍ പൂര്‍ണമായും തകരുകയും, മുപ്പതോളം വീടുകള്‍ ഭാഗികമായും തകര്‍ന്ന് വാസയോഗ്യമല്ലാതാവുകയും ചെയ്തിരുന്നു. ഈ വീടുകളില്‍ താമസിച്ചിരുന്നവര്‍ക്ക് നിലവില്‍ പട്ടയം ഉണ്ടായിരുന്നില്ല.
ഇവരെ പുനരധിവസിപ്പിക്കുവാന്‍ അടിയന്തിരമായി താല്‍ക്കാലിക താമസ സൗകര്യം ഏര്‍പ്പാടാക്കുമെന്ന് എം.എല്‍.എ പറഞ്ഞു. ഇതിനു വേണ്ടി സുമനസ്സുകളായ ആളുകള്‍ മുന്നോട്ടു വന്നിട്ടുണ്ട്. ഇഷ്ടികയും, ചുടുകല്ലും ഉപയോഗിച്ച് നിര്‍മ്മിച്ച വീടുകളില്‍ താമസിച്ചിരുന്ന ഇവര്‍ക്ക് പട്ടയം ഇല്ല എന്നുള്ള സാങ്കേതിക പ്രശ്‌നം നിലവിലുണ്ടെങ്കിലും വെള്ളപ്പൊക്കത്തിന്റെ ഭാഗമായി മറ്റ് പൊതു വിഭാഗം ആളുകള്‍ക്ക് ലഭ്യമാകുന്ന സഹായങ്ങളും, ആനുകൂല്യങ്ങളും ഇവര്‍ക്കും കൂടി ലഭ്യമാക്കുന്നതിനു വേണ്ട നടപടികള്‍ സ്വീകരിക്കുവാന്‍ മുഖ്യമന്ത്രിയോട് അഭ്യര്‍ത്ഥിക്കുമെന്നും എം.എല്‍.എ അറിയിച്ചു