തൃശൂര്‍: കാര്‍ഷിക അനുബന്ധ മേഖലകളിലെ കര്‍ഷകരുടെ ഉന്നമനം ലക്ഷ്യമാക്കി പ്രവര്‍ത്തിക്കുന്ന ആത്മ സ്റ്റാഫ് അസോസിയേഷന്‍ സംഘടിപ്പിക്കുന്ന ആത്മ കര്‍ഷക സംഗമം-2016 ഈമാസം 24ന് രാവിലെ പത്ത് മണിക്ക് കൊടുങ്ങല്ലൂര്‍ ശ്രീനാരായണപുരത്തുള്ള തേവര്‍ പ്ലാസയില്‍ നടക്കും. കൃഷി മന്ത്രി അഡ്വ. വി.എസ് സുനില്‍ കുമാര്‍ ഉദ്ഘാടനം ചെയ്യും. ഇ.ടി ടൈസന്‍ മാസ്റ്റര്‍ എം.എല്‍.എ അധ്യക്ഷനാകും. വി.ആര്‍ സുനില്‍ കുമാര്‍ എം.എല്‍.എ മുഖ്യതിഥിയാകും. ആത്മ തൃശൂര്‍ പ്രൊജക്ട് ഡയറക്ടര്‍ വി.എസ് റോയ് നയിക്കുന്ന കാര്‍ഷിക സെമിനാര്‍, കര്‍ഷകരുടെ പ്രശ്‌നങ്ങള്‍ക്ക് പരിഹാരം കാണുന്നതിനുള്ള അവലോകന യോഗം തുടങ്ങിയവ പരിപാടിയുടെ ഭാഗമായി നടക്കും. വിവിധ ജില്ലകളില്‍ നിന്നുള്ള കര്‍ഷക പ്രതിനിധികള്‍ കാര്‍ഷിക അനുബന്ധ മേഖലകളിലെ അറിവുകള്‍ പങ്കുവെക്കും. വാര്‍ത്താ സമ്മേളനത്തില്‍ കെ.പി കണ്ണന്‍, എം.പി സനുരാജ്, എം.എസ് ശ്യാംകുമാര്‍ പങ്കെടുത്തു.