ഖാര്‍ത്തൂം: യു.എ.ഇയെ പിന്തുടര്‍ന്ന് സുദാനും ഇസ്‌റാഈലുമായി നയതന്ത്ര ബന്ധം സ്ഥാപിക്കുമെന്ന റിപ്പോര്‍ട്ടുകള്‍ക്കിടെ അതിനെ എതിര്‍ത്ത് രാജ്യത്തെ പ്രമുഖ രാഷ്ട്രീയ പാര്‍ട്ടികള്‍. ഇസ്‌റാഈല്‍ അധിനിവേശ രാജ്യമാണെന്നും അവരുമായി ഒരുതരത്തിലുള്ള ബന്ധവും സ്ഥാപിക്കാന്‍ പാടില്ലെന്നും ബാഅത്ത്, പോപുലര്‍ കോണ്‍ഗ്രസ് പാര്‍ട്ടികള്‍ സംയുക്ത പ്രസ്താവനയില്‍ പറഞ്ഞു. 

നേരത്തെ സുദാന്‍ വിദേശകാര്യ മന്ത്രാലയ മുന്‍ വക്താവ് ഹൈദര്‍ ബദവി തന്റെ രാജ്യം ഇസ്‌റാഈലുമായി ബന്ധം സ്ഥാപിക്കാന്‍ ആഗ്രഹിക്കുന്നതായി വെളിപ്പെടുത്തിയിരുന്നു. അതിനിടെ മൊറോക്കോ ഇസ്‌റാഈലുമായി നയതന്ത്രബന്ധം സ്ഥാപിക്കുകയില്ലെന്ന് പ്രധാനമന്ത്രി സഅദുദ്ദീന്‍ അല്‍ ഉസ്മാനി പറഞ്ഞു.