വൈക്കം: നിയോജകമണ്ഡലത്തില്‍ റെക്കോര്‍ഡ് പോളിങ്. മണ്ഡലത്തിലെ ഭൂരിഭാഗം പോളിങ് ബൂത്തുകളിലും വോട്ടര്‍മാരുടെ നീണ്ടനിരയായിരുന്നു. വോട്ടിങ് സമയം അവസാനിച്ചശേഷവും വോട്ട് ചെയ്യാനെത്തിയവരുടെ ക്യൂ ദൃശ്യമായിരുന്നു.
പലയിടത്തും വോട്ടിങ് തുടരുമ്പോള്‍ അനൗദ്യോഗിക കണക്കനുസരിച്ച് നിയോജകമണ്ഡലത്തിലെ പോളിങ് ശതമാനം 70 ശതമാനം കടന്നു.
കഴിഞ്ഞ തവണത്തേതിനേക്കാള്‍ കൂടുതലായിരിക്കും വോട്ടിങ് ശതമാനമെന്നാണ് നിലവിലെ വോട്ടിങ് നില സൂചിപ്പിക്കുന്നത്. വോട്ടിങ് അവസാനിക്കുന്ന സമയമായ ആറുമണിക്ക് ശേഷം ആരെയും വോട്ടിങ് കേന്ദ്രങ്ങളിലേക്ക് പ്രവേശിപ്പിച്ചില്ല.
ആറു മണിക്ക് പോളിങ് സ്റ്റേഷന്റെ ഗേറ്റ് അടച്ചശേഷം ക്യൂവില്‍ നിന്നവര്‍ക്കെല്ലാം ടോക്കണ്‍ നല്‍കിയാണ് വോട്ടെടുപ്പ് തുടര്‍ന്നത്. പലയിടത്തും പോളിങ് മന്ദഗതിയിലാണെന്ന ആക്ഷേപം ഉയര്‍ന്നിരുന്നു.
കൃത്യമായ പോളിങ് ശതമാനം സംബന്ധിച്ച അന്തിമകണക്ക് രാത്രി വൈകി ലഭിക്കുമെന്നാണ് പ്രതീക്ഷിക്കുന്നത്.