തിരുവനന്തപുരം: പൂവും പൂവിളിയും ആഘോഷവുമില്ലാതെ തിരുവോണം കടന്നുപോയി. പ്രളയക്കെടുതിയില്‍ ദുരിതങ്ങള്‍ക്കിടയില്‍ കേരളത്തില്‍ ജനങ്ങളും സര്‍ക്കാരും സന്നദ്ധസംഘടനകളും ഒരേമനസ്സോടെ ആഘോഷങ്ങള്‍ മാറ്റിവച്ച് ദുരിതാശ്വാസ, പുനരധിവാസ പ്രവര്‍ത്തനങ്ങള്‍ക്ക് മുന്നിട്ടിറങ്ങി.
ദുരിതാശ്വാസ ക്യാംപുകളിലാണ് ഇത്തവണ ഓണത്തിന് നാട്ടുകാരുടെ കൂട്ടായ്മകള്‍ സംഘടിപ്പിച്ചത്. ആഘോഷാരവങ്ങളില്ലെങ്കിലും ദുരിതപര്‍വത്തില്‍നിന്ന് കരകയറിക്കൊണ്ടിരിക്കുന്ന സാഹചര്യത്തില്‍ ഈ ഒത്തൊരുമയും കൈത്താങ്ങാണ് പലര്‍ക്കും നഷ്ടങ്ങളുടെ വേദനകള്‍ക്കിടയില്‍ ആശ്വാസമായത്.
പത്തനംതിട്ട, ആലപ്പുഴ, എറണാകുളം ജില്ലകളില്‍ കൂടുതലായും മറ്റിടങ്ങളില്‍ ചുരുക്കം എണ്ണവും ദുരിതാശ്വാസക്യാംപുകള്‍ പ്രവര്‍ത്തിക്കുന്നുണ്ട്.
ഇന്നലത്തെ കണക്ക് പ്രകാരം സംസ്ഥാനമാകെ 2,287 ക്യാംപുകളിലായി 2,18,104 കുടുംബങ്ങളിലെ 8,69,224 പേരാണ് ഉള്ളത്. ജില്ലാ ഭരണകൂടങ്ങള്‍ സന്നദ്ധ സംഘടനകളുടെ സഹായത്തോടെ എല്ലാ ക്യാംപുകളിലും തിരുവോണനാളില്‍ സദ്യയൊരുക്കി.