തിരുവനന്തപുരം: വയലിനിസ്റ്റ് ബാലഭാസ്‌കറിന്റെ മരണവുമായി ബന്ധപ്പെട്ട് കലാഭവന്‍ സോബിയെയും പ്രകാശന്‍ തമ്പിയെയും നുണപരിശോധനക്ക് വിധേയരാക്കാന്‍ സാധ്യത. നുണപരിശോധനക്ക് തയാറാണെന്ന് ഇവര്‍ രണ്ടു പേരും സി.ബി.ഐയെ അറിയിച്ചിട്ടുണ്ട്. ഇക്കാര്യത്തില്‍ അന്തിമ തീരുമാനം ഉടനുണ്ടാകും. കേസില്‍ സ്വര്‍ണക്കടത്ത് കേസ് പ്രതിയായ വിഷ്ണു, ബാലഭാസ്‌കറുമായി അടുപ്പം പുലര്‍ത്തിയിരുന്ന പാലക്കാട്ടെ ആയുര്‍വേദ ആശുപത്രി നടത്തിപ്പുകാര്‍ തുടങ്ങിയവരെ ചോദ്യം ചെയ്യാനുണ്ട്. ഇവരെ ഉള്‍പ്പെടെ ചോദ്യം ചെയ്ത ശേഷമാകും നുണപരിശോധനയുടെ ഘട്ടത്തിലേക്ക് അന്വേഷണ സംഘം കടക്കുക. അപകടത്തില്‍പ്പെടുന്നതിന് മുന്‍പ് ബാലഭാസ്‌കറിന്റെ കാര്‍ ആക്രമിക്കപ്പെട്ടുവെന്നതുള്‍പ്പെടെയുള്ള കലാഭവന്‍ സോബിയുടെ വെളിപ്പെടുത്തലുകള്‍ക്ക് അടിസ്ഥാനമില്ലെന്നാണ് സി.ബി.ഐയുടെ പ്രാഥമിക നിഗമനം.