ബാഴ്‌സലോണ: ലാലിഗയില്‍ ബാഴ്‌സലോണക്ക് കിരീടം മൂന്ന് പോയിന്റ് മാത്രം അകലെ. കഴിഞ്ഞ ദിവസം നടന്ന മത്സരത്തില്‍ ജയം സ്വന്തമാക്കിയതോടെയാണ് ബാഴ്‌സലോണ കിരീടത്തിലേക്ക് കൂടുതല്‍ അടുത്തത്. ചൊവ്വാഴ്ച നടന്ന മത്സരത്തില്‍ അലാവെസിനെ 2-0 എന്ന സ്‌കോറിന് തോല്‍പ്പിച്ചതോടെയാണ് ബാഴ്‌സലോണ കിരീടത്തിലേക്കുള്ള ദൂരം കുറച്ചത്. കാര്‍ലെസ് അലെന(54), ലൂയിസ് സുവാരസ്(60) എന്നിവരാണ് ബാഴ്‌സയ്ക്കുവേ@ണ്ടി ഗോളുകള്‍ കണ്ടെത്തിയത്. ജയത്തോടെ 34 കളികളില്‍നിന്ന് ബാഴ്‌സയ്ക്ക് 80 പോയിന്റായി. ലെവന്റെക്കെതിരേയാണ് ബാഴ്‌സലോണയുടെ അടുത്ത മത്സരം.

മറ്റൊരു മത്സരത്തില്‍ വല്ലഡോളിഡ് എതിരില്ലാത്ത ഒരു ഗോളിന് ജിറോണയെ പരാജയപ്പെടുത്തി. 67-ാം മിനിട്ടില്‍ മൈക്കലാണ് വല്ലഡോളിഡിന് വേണ്ടി ഗോള്‍ നേടിയത്. പട്ടികയില്‍ 17-ാം സ്ഥാനത്തുള്ള ടീമാണ് ജിറോണ. 18, 19, 20 സ്ഥാനങ്ങളിലുള്ള ലെവന്റെ, ഹുയസ്‌ക, റയോ വല്ലാകാനോ എന്നീ ടീമുകള്‍ ലാലിഗയില്‍ നിന്ന് സെഗുണ്ട ലീഗിലേക്ക് തരം താഴ്ത്തും.

ടോട്ടനത്തിന് ജയം
ഇംഗ്ലീഷ് പ്രീമിയര്‍ ലീഗില്‍ മൂന്നാം സ്ഥാനത്തുള്ള ടോട്ടനം ജയത്തോടെ ചാംപ്യന്‍സ്‌ലീഗ് യോഗ്യതയ്ക്ക് ഒരുപടികൂടി അടുത്തു. പൊരുതിക്കളിച്ച ബ്രൈറ്റനെതിരേ ഒരു ഗോളിനായിരുന്നു ടോട്ടനത്തിന്റെ ജയം. ക്രിസ്റ്റ്യന്‍ എറിക്‌സന്‍(88) ടോട്ടനത്തിനായി സ്‌കോര്‍ ചെയ്തു. 35 കളികളില്‍നിന്ന് ടോട്ടനത്തിന് 70 പോയന്റായി. ചെല്‍സി, ആഴ്‌സണല്‍, മാഞ്ചസ്റ്റര്‍ യുനൈറ്റഡ് ടീമുകളാണ് തൊട്ടുപിന്നിലുള്ളത്.
മറ്റൊരു മത്സരത്തില്‍ വാറ്റ്‌ഫോര്‍ഡും സതാംപ്ടണും സമനിലയില്‍ പിരിഞ്ഞു. ഇരുടീമുകളും ഓരോ ഗോള്‍വീതം നേടി. പ്രീമിയര്‍ ലീഗ് അവസാനത്തിലേക്ക് അടുക്കുമ്പോള്‍ കിരീടപ്പോരാട്ടത്തിന് ശക്തി കൂടുകയാണ്. സിറ്റിയും ലിവര്‍പൂളും തമ്മിലുള്ള മത്സരമാണ് ഒന്നാം സ്ഥാനത്തിന് വേണ്ടി നടക്കുന്നത്.