കാളികാവ്: കാട്ടാനയുടെ ചവിട്ടേറ്റ് അന്യസംസ്ഥാന തൊഴിലാളി മരിച്ചു. ചോക്കാട് നാല്‍പത് സെന്റ് ഗിരിജന്‍ കോളനിയോട് ചേര്‍ന്നുള്ള വാഴത്തോട്ടത്തിലെ കാവല്‍ക്കാരന്‍ മഹേഷി(39)നെയാണ് ആന ചവിട്ടിക്കൊന്നത്. ഞായറാഴ്ച രാത്രിയാണ് മഹേഷിന് നേരെ ആനയുടെ ആക്രമണമുണ്ടായത്. വാഴ നശിപ്പിച്ച ഒറ്റയാനെ പിന്തിരിപ്പിക്കാനുള്ള ശ്രമത്തിടെയാണ് ആന ഇയാള്‍ക്ക് നേരെ തിരിഞ്ഞത്. ബഹളമുണ്ടാക്കിയ മഹേഷിനെ ആന കുത്തി വീഴ്ത്തി ചവിട്ടിക്കൊല്ലുകയായിരുന്നു. ജാര്‍ഖണ്ഡ് ലോഹര്‍ ദാഖ ജില്ലക്കാരനായ മഹേഷ് മൂന്ന് വര്‍ഷം മുന്‍പാണ് ചോക്കാട് ജോലിക്കെത്തിയത്. രണ്ട് വര്‍ഷം മുന്‍പ് ഇവിടെ റബര്‍ എസ്റ്റേറ്റിലെ ജീവനക്കാരനും ഒറ്റയാന്റെ അക്രമത്തില്‍ കൊല്ലപ്പെട്ടിരുന്നു. കാളികാവ് എസ്.ഐ പി.ജെ കുര്യാക്കോസ് നടപടികള്‍ പൂര്‍ത്തിയാക്കി മൃതദേഹം മഞ്ചേരി മെഡിക്കല്‍ കോളജിലേക്ക് മാറ്റി.