നെടുമ്പാശ്ശേരി: ഹജ്ജ് കര്‍മത്തിനായി കേരളം, ലക്ഷദ്വീപ്, മാഹി എന്നിവിടങ്ങളില്‍ നിന്നും ഹജ്ജ് കമ്മിറ്റി വഴി യാത്ര തിരിച്ച ഹാജിമാര്‍ നെടുമ്പാശ്ശേരിയില്‍ മടങ്ങിയെത്തും. സംസ്ഥാനത്ത് നിന്ന് യാത്ര തിരിച്ച ഹാജിമാരുടെ മടക്കയാത്ര അടുത്ത മാസം 12 മുതലാണ് ആരംഭിക്കുന്നത്.
പ്രളയം കാരണം അടച്ചിട്ട നെടുമ്പാശ്ശേരി അന്താരാഷ്ട്ര വിമാനത്താവളത്തിന്റെ പ്രവര്‍ത്തനം 29 മുതല്‍ പുനരാരംഭിക്കും. ഈ സാഹചര്യത്തിലാണ് ഹാജിമാരുടെ മടക്കയാത്രയ്ക്ക് നെടുമ്പാശ്ശേരി വഴി തന്നെ അവസരമൊരുങ്ങുന്നത്. ഹാജിമാര്‍ക്ക് വിതരണം ചെയ്യുന്നതിനുള്ള സംസം വെള്ളം വിമാനത്താവളത്തിലെ ടി 3 ടെര്‍മിനലില്‍ സൂക്ഷിച്ചിട്ടുണ്ട്. അഞ്ച് ലിറ്റര്‍ വീതമുള്ള 12,000 ക്യാനുകളാണ് മുന്‍കൂട്ടി എത്തിച്ചത്. ഹാജിമാരെ ജിദ്ദയില്‍ എത്തിച്ച ശേഷം മടങ്ങി വന്ന സഊദി എയര്‍ലൈന്‍സ് വിമാനങ്ങളിലാണ് സംസം കൊണ്ടുവന്നത്.
കേരളത്തില്‍ നിന്നുള്ള ഹാജിമാരുടെ മടക്കയാത്രക്ക് 30 സര്‍വിസുകളാണ് സഊദി എയര്‍ലൈന്‍സ് ചാര്‍ട്ട് ചെയ്തിരിക്കുന്നത്. 28 വിമാനങ്ങളില്‍ 410 പേര്‍ വീതം എത്തും. രണ്ട് വിമാനങ്ങളില്‍ 381 ഉും 154 ഉും തീര്‍ഥാടകരാണ് ഉണ്ടാകുക. മദീന വിമാനത്താവളത്തില്‍ നിന്നാണ് ഇവര്‍ നാട്ടിലേക്ക് മടങ്ങുന്നത്.
സെപ്റ്റംബര്‍ 12 ന് സഊദി സമയം പുലര്‍ച്ചെ 4.40 ന് മദീനയില്‍ നിന്നും ആദ്യസംഘം ഹാജിമാരുമായി പുറപ്പെടുന്ന വിമാനം ഉച്ചയ്ക്ക് ഒരു മണിക്ക് നെടുമ്പാശ്ശേരിയിലെത്തും. സെപ്റ്റംബര്‍ 26 നാണ് അവസാന സംഘം എത്തുന്നത്. മടങ്ങിയെത്തുന്ന ഹാജിമാരെ സ്വീകരിക്കാന്‍ സംസ്ഥാന ഹജ്ജ് കമ്മിറ്റിയുടെ നേതൃത്വത്തില്‍ വിമാനത്താവളത്തില്‍ വിപുലമായ സൗകര്യങ്ങളാണ് ഒരുക്കുന്നത്.