ന്യൂഡല്‍ഹി: കോണ്‍ഗ്രസിന് പുതിയ അധ്യക്ഷനെ തെരഞ്ഞെടുക്കുന്നത് ജനുവരിയില്‍ ഉണ്ടാകുമെന്ന് റിപ്പോര്‍ട്ട്. മുതിര്‍ന്ന രണ്ട് നേതാക്കളെ ഉദ്ധരിച്ച് ഹിന്ദുസ്ഥാന്‍ ടൈംസാണ് ഇക്കാര്യം റിപ്പോര്‍ട്ട് ചെയ്തിരിക്കുന്നത്.

കോണ്‍ഗ്രസിന് സ്ഥിരം അധ്യക്ഷനെ കണ്ടെത്തണമെന്ന 23 നേതാക്കളുടെ കത്തിനു പിന്നാലെ ഇടക്കാല അധ്യക്ഷയായ സോണിയാ ഗാന്ധി രാജിക്കൊരുങ്ങിയിരുന്നു. എന്നാല്‍ സോണിയ തന്നെ തുടരാനാണ് കോണ്‍ഗ്രസ് പ്രവര്‍ത്തക സമിതി യോഗം തീരുമാനിച്ചത്. അടുത്ത ആറു മാസത്തിനുള്ളില്‍ പുതിയ അധ്യക്ഷനെ തെരഞ്ഞെടുക്കണമെന്ന നിര്‍ദേശമാണ് രാഹുല്‍ ഗാന്ധിയും പ്രിയങ്കാ ഗാന്ധിയും പ്രവര്‍ത്തക സമിതിക്കു മുന്നില്‍ വച്ച നിര്‍ദേശം.

ഈ വര്‍ഷത്തെ ബിഹാര്‍ തെരഞ്ഞെടുപ്പിനു ശേഷം മതി പുതിയ പ്രസിഡന്റിനെ തെരഞ്ഞെടുക്കല്‍ എന്നാണ് കോണ്‍ഗ്രസ് നേതൃത്വത്തിന്റെ തീരുമാനം. കേരളം, തമിഴ്‌നാട്, പശ്ചിമബംഗാള്‍, അസം, പുതുച്ചേരി നിയമസഭകളിലേക്കുള്ള തെരഞ്ഞെടുപ്പുകള്‍ അടുത്ത വര്‍ഷം ഏപ്രലിലാണ് നടക്കുക. അതിനു മുന്നോടിയായി ഒരുങ്ങുകയെന്ന വലിയ ദൗത്യമാണ് പുതിയ അധ്യക്ഷനു മുന്നിലുള്ളത്.