ലണ്ടന്‍: ബ്രിട്ടനില്‍ കോണ്‍ഗ്രസ് അധ്യക്ഷന്‍ രാഹുല്‍ ഗാന്ധി പങ്കെടുത്ത പരിപാടി അലങ്കോലപ്പെടുത്താന്‍ ശ്രമം. വെസ്റ്റ് ലണ്ടനിലെ റൂയിസ്‌ലിപ്പില്‍ ഇന്ത്യന്‍ ഓവര്‍സിസ് കോണ്‍ഗ്രസ് സംഘടിപ്പിച്ച പരിപാടിക്കിടെയാണു സംഭവം. ഖലിസ്താന്‍ അനുകൂലികളാണു സംഭവത്തിനു പിറകില്‍.
രാഹുല്‍ ഗാന്ധി എത്തുന്നതിനു മുന്‍പ് വേദിയില്‍ കയറി സംഘം ഖലിസ്താന്‍ അനുകൂല മുദ്രാവാക്യം മുഴക്കുകയായിരുന്നു. ഇവരെ വേദിയിലുണ്ടായിരുന്ന സ്‌കോട്ട്‌ലന്‍ഡ് യാര്‍ഡ് ഉദ്യോഗസ്ഥര്‍ നീക്കം ചെയ്തു. തുടര്‍ന്നാണു രാഹുല്‍ വേദിയിലെത്തി ബി.ജെ.പിക്കും പ്രധാനമന്ത്രി നരേന്ദ്ര മോദിക്കുമെതിരേ രൂക്ഷ വിമര്‍ശം അഴിച്ചുവിട്ടത്. കഴിഞ്ഞ ദിവസം നടന്ന ഒരു ചടങ്ങില്‍ 1984ലെ സിഖ് കലാപത്തിലുള്ള കോണ്‍ഗ്രസ് പാര്‍ട്ടിയുടെ പങ്ക് നിഷേധിച്ചിരുന്നു. ഇതു വന്‍ പ്രതിഷേധം വിളിച്ചുവരുത്തുകയും ചെയ്തിരുന്നു.
2019ലെ തെരഞ്ഞെടുപ്പിനു മുന്നോടിയായി നടത്തുന്ന ഔട്ട്‌റീച്ച് പരിപാടിയുടെ ഭാഗമായാണ് രാഹുല്‍ ലണ്ടനിലെത്തിയത്. നേരത്തെ ജര്‍മനിയിലെത്തി പ്രമുഖരുമായി രാഹുല്‍ കൂടിക്കാഴ്ച നടത്തിയിരുന്നു.