ജക്കാര്‍ത്ത: ഗെയിംസ് റെക്കോര്‍ഡ് തകര്‍ത്ത് ഇന്ത്യന്‍ ഷോട്ട്പുട്ട് താരം തേജീന്ദര്‍ പാല്‍ സിങ് സ്വര്‍ണം സ്വന്തമാക്കി. ശനിയാഴ്ച നടന്ന പുരുഷന്‍മാരുടെ ഷോട്ട്പുട്ടിലായിരുന്നു തേജീന്ദറിന്റെ സ്വര്‍ണ നേട്ടം. ഇതോടെ ഇന്ത്യക്ക് ഗെയിംസില്‍ ഏഴ് സ്വര്‍ണം നേടാനായി. 20.75 മീറ്റര്‍ ഷോട്ട് എറിഞ്ഞായിരുന്നു തേജീന്ദറിന്റെ സ്വര്‍ണ നേട്ടം.
ഗെയിംസ് റെക്കോര്‍ഡോടെയാണ് താരം സ്വര്‍ണം നേടിയത്. 23 കാരനായ താരത്തിന്റെ ആദ്യത്തെ ഗെയിംസ് മെഡല്‍ കൂടിയായിരുന്നു ശനിയാഴ്ച പിറന്നത്. ആറു വര്‍ഷം പഴക്കമുള്ള റെക്കോര്‍ഡാണ് തേജീന്ദര്‍ തകര്‍ത്തത്. 2012ല്‍ ഓംപ്രകാശ് കര്‍ഹാന സ്ഥാപിച്ച ദേശീയ റെക്കോര്‍ഡാണ് തേജീന്ദര്‍ പഴങ്കഥയാക്കിയത്. 20.69 മീറ്ററായിരുന്നു ഈ ഇനത്തില്‍ ഗെയിംസ് റെക്കോര്‍ഡായി ഉണ്ടായിരുന്നത്. സീസണിലെ മികച്ച സമയം കുറിച്ചായിരുന്നു താരം ഏഷ്യന്‍ ഗെയിംസിന് യോഗ്യത നേടിയത്. അതിനാല്‍ കൂടുതല്‍ മെഡല്‍ പ്രതീക്ഷയും താരത്തിനായിരുന്നു. അഞ്ചാമത്തെ ശ്രമത്തിലായിരുന്നു തേജീന്ദര്‍ റെക്കോര്‍ഡ് നേട്ടം സ്വന്തമാക്കിയത്. ചൈനീസ് താരം ലിയു യുങ്ങ് 19.52 മീറ്റര്‍ എറിഞ്ഞ് വെള്ളിയും ഖസാക്കിസ്താന്‍ താരം ഇവാന്‍ ഇവനോവ് 19.40 മീറ്റര്‍ എറിഞ്ഞ് വെങ്കലവും സ്വന്തമാക്കി. 20 മീറ്ററിനു മുകളില്‍ എറിഞ്ഞ ഏക താരവും തേജീന്ദറായിരുന്നു.