ആലപ്പുഴ: പരമാവധി ഒറ്റയ്ക്ക് വീട്ടിലേക്ക് മടങ്ങരുത്. ഒറ്റയ്ക്ക് വീട്ടിലേയ്ക്ക് മടങ്ങരുത്. മുതിര്‍ന്നവര്‍ രണ്ടോ അതിലധികമോ പേര്‍ ഒരുമിച്ചുപോകണം. ഒരു കാരണവശാലും രാത്രിയില്‍ വീട്ടിലേയ്ക്ക് പോകരുത്. വിഷപ്പാമ്പുകളെ കണ്ടാല്‍ 9656135555 (ആലപ്പുഴ റേഞ്ച്) 8281004595 (ചെങ്ങന്നുര്‍ റേഞ്ച്) എന്നീ നമ്പരുകളില്‍ ബന്ധപ്പെടുക.
ശുദ്ധവായു ലഭിക്കുന്നതിന് ജനലുകളും വാതിലുകളും തുറന്നിടുക. കഴിയുമെങ്കില്‍ വീടിന് പുറത്തുനിന്നും തുറക്കുക. ചെന്നുകയറിയ ഉടനെ തീ കത്തിക്കരുത്. ഗ്യാസ് സിലിണ്ടര്‍ ഓഫാക്കുക. മതില്‍, വീട് എന്നിവയ്‌ക്കൊക്കെ ബലക്ഷയം ഉണ്ടാകാന്‍ സാധ്യതയുളളതിനാല്‍ ഒരു കാരണവശാലും തളളിത്തുറക്കരുത്. ശുചീകരണം തുടങ്ങും മുമ്പ് രോഗപ്രതിരോധ മരുന്നുകള്‍ നിര്‍ബന്ധമായും കഴിക്കണം. ക്ലീനിംഗ് നടത്തുമ്പോള്‍ കൈയുറകളും, മാസ്‌ക് ഉപയോഗിക്കുകയോ തോര്‍ത്ത് ഉപയോഗിച്ച് മൂക്ക് മറക്കുകയോ ചെയ്യുക. വീട് പൂര്‍ണ്ണമായും വൃത്തിയാക്കുന്നതുവരെ ചെരിപ്പ് ഉപയോഗിക്കണം.
മാലിന്യങ്ങള്‍ ജൈവം അജൈവം എന്നിങ്ങനെ പ്രത്യേകം തരംതിരിക്കുക. അഴുകുന്ന മാലിന്യങ്ങള്‍ കുഴിയില്‍ നിക്ഷേപിച്ച് കമ്പോസ്റ്റാക്കുക. അജൈവമാലിന്യങ്ങള്‍ കഴുകി വൃത്തിയാക്കിയശേഷം സുക്ഷിക്കുക. ഇലക്ട്രിക് ഇലക്ട്രോണിക് സാധനങ്ങളും പ്ലാസ്റ്റിക്കുകളും പ്രത്യേകം പ്രത്യേകം ചാക്കിലാക്കി സൂക്ഷിക്കുക. വീടുകളും സ്ഥാപനങ്ങളും വൃത്തിയാക്കുന്നതിനുമുമ്പ് വൈദ്യുതിയുടേയും പാചകവാതകത്തിന്റെയും സുരക്ഷ പരിശോധിച്ച് ഉറപ്പുവരുത്തണം. വീടും പരിസരവും വൃത്തിയാക്കിയശേഷം സാധാരണ ബ്ലീച്ചിങ് പൗഡര്‍ ഉപയോഗിച്ച് ലായനിയാക്കി തളിക്കുക. (10 ലിറ്റര്‍ വെള്ളത്തിന് 150 ഗ്രാം എന്ന കണക്കില്‍) മലിനപ്പെട്ട കിണറുകള്‍, ടാങ്കുകള്‍, കുടിവെളള സ്രോതസ്സുകള്‍ പെപ്പിലൂടെ ലഭിക്കുന്ന വെളളം എന്നിവ സൂപ്പര്‍ ക്ലോറിനേഷന്‍ (1000 ലിറ്റര്‍ വെളളത്തില്‍ അഞ്ചു ഗ്രാം ബ്ലീച്ചിങ് പൗഡര്‍) നടത്തി ഒരു മണിക്കൂറിനുശേഷം മാത്രം ഉപയോഗിച്ചുതുടങ്ങുക. തിളപ്പിച്ച വെള്ളം മാത്രം കുടിക്കാന്‍ ഉപയോഗിക്കുക (കുപ്പിവെള്ളം ഉള്‍പ്പെടെ).
വീടിനുളളിലിരുന്ന ഭക്ഷ്യസാധനങ്ങള്‍ ഒരുകാരണവശാലും ഉപയോഗിക്കരുത്. ഫ്‌ളഷുകളും പൈപ്പുകളും ഉപയോഗപ്രദമാണോ എന്ന് പരിശോധിക്കുക. വീടിന്റെ നാലുവശത്തുനിന്നുമുളള ഫോട്ടോ എടുത്തുവെയ്ക്കണം. രോഗലക്ഷണങ്ങള്‍ അനുഭവപ്പെട്ടാല്‍ എത്രയം വേഗം ഡോക്ടറുടെ സേവനം തേടേണ്ടതാണ്. നാശനഷ്ടങ്ങളുണ്ടായ വസ്തുക്കളുടെയും സാധനങ്ങളുടെയും ഫോട്ടോകളും എടുത്തുസൂക്ഷിക്കുക. ഇവ നാശനഷ്ടങ്ങളുടെ കണക്കെടുപ്പിന് പിന്നീട് ഗുണകരമാകും. ശുചിത്വമിഷന്‍ ഇത് സംബന്ധിച്ച് നോട്ടീസ് തയ്യാറാക്കി വിതരണം ചെയ്യുന്നുണ്ട്.