ആലപ്പുഴ : റീ സര്‍വേ നടത്താന്‍ സ്വന്തം ഭൂമി വൃത്തിയാക്കാനെത്തിയ അവകാശികള്‍ക്കെതിരേ പൊലിസ് കേസെടുത്തെന്ന് ആക്ഷേപം.
സമീപത്തെ റിസോര്‍ട്ട് കമ്പനിയുടെ പരാതിയിലാണ് നിയമിവുദ്ധമായി പൊലിസ് കേസെടുത്തതെന്നാണ് ആരോപണം. ആലപ്പുഴ ടൗണിലെ ആദ്യകാല വ്യവസായിയായിരുന്ന പിച്ചറാവുത്തര്‍ മണ്ണഞ്ചേരി വില്ലേജിലെ പൊന്നാട് പെരുന്തുരുത്തി മുറിയിലെ കായലിനോട് ചേര്‍ന്നു കിടക്കുന്ന രണ്ടേക്കര്‍ ഭൂമി 1945 ല്‍ തീറെഴുതി വാങ്ങിയിരുന്നു. ഈ ഭൂമിയുടെ മൂന്ന് വശവും സ്വകാര്യ റിസോര്‍ട്ട് കമ്പിയുടെ കൈവശമാണ്. പിച്ചറാവുത്തറുടെ അനന്തരാവകാശികള്‍ അടുത്തിടെ റീസര്‍വേക്കായി ഭൂമി വൃത്തിയാക്കി എടുക്കാന്‍ എത്തിയതോടെയാണ് റിസോര്‍ട്ട് കമ്പനി എതിര്‍പ്പുമായി രംഗത്തെത്തിയതെന്ന് പറയുന്നു.
ഈ രണ്ട് ഏക്കര്‍ വസ്തു മുന്‍പ് തന്നെ റിസോര്‍ട്ട് ഉടമകള്‍ ആവശ്യപ്പെട്ടതായും. ഇതിന്റെ പേരില്‍ റിസോര്‍ട്ട് കമ്പനി അന്തരാവകാശികളെ നിരന്തരമായി ശല്യപ്പെടുത്തിയിരുന്നതായും പറയുന്നു.
എന്നാല്‍, ഇതിനൊന്നും അനന്തരാവകാശികള്‍ വഴങ്ങിയില്ല. നിലവില്‍ വസ്തു റീസര്‍വേ നടക്കാത്തതിനാല്‍ ചെങ്ങന്നൂര്‍ റീ സര്‍വേ അസി. ഡയറക്ടര്‍, അമ്പലപ്പുഴ അഡീഷ്ണല്‍ തഹസില്‍ദാര്‍ എന്നിവരുടെ നിര്‍ദേശപ്രകാരം റീ സര്‍വേ നടത്താന്‍ അതിരു നിര്‍ണയിക്കാനായി പിച്ചറാവുത്തറുടെ അവകാശികള്‍ കഴിഞ്ഞ ദിവസം ഭൂമി വൃത്തിയാക്കി. ഇതിനിടെയാണ് പൊലിസ് രംഗത്തെത്തിയത്.
റിസോര്‍ട്ട് ഉടമകള്‍ കൊടുത്ത പരാതിയില്‍ പൊലിസ് കേസെടുത്തതായാണ് പിച്ചറാവുത്തറുടെ അവകാശികള്‍ പറയുന്നത്. സിവില്‍ കേസുകളില്‍ പൊലിസ് ഇടപെടരുതെന്ന ഹൈക്കോടതി വിധി നിലവിലുണ്ട്.