കോതമംഗലം: തൃക്കാരിയൂര്‍ തുളുശേരിക്കവല ഭാഗത്ത് രാത്രിയില്‍ മാലിന്യം തള്ളുന്നതായി പരാതി. പ്ലാസ്റ്റിക് കൂടുകളിലും ചാക്കുകളിലുമായാണ് മാലിന്യങ്ങള്‍ നിക്ഷേപിക്കുന്നത്. വീടുകളില്‍ നിന്നും ഹോട്ടലുകളില്‍ നിന്നുമുള്ള പച്ചക്കറി, മത്സ്യമാംസങ്ങള്‍, മുട്ടതൊണ്ടുകള്‍, കുപ്പികള്‍, പാട്ടകള്‍, പഴഞ്ചന്‍ തുണികള്‍ തുടങ്ങിയ മാലിന്യങ്ങളും ഇവിടെ തള്ളുന്നുണ്ട്. വാര്‍ഡംഗം സന്ധ്യ സുനില്‍കുമാറിന്റെ നേതൃത്വത്തില്‍ നാട്ടുകാര്‍ സ്ഥലം സന്ദര്‍ശിക്കുകയും പ്രശ്‌നം ബന്ധപ്പെട്ട് അധികാരികളുടെ മുന്നില്‍ അറിയിക്കുകയും ചെയ്തു. ഗുരുകൃപ കുടുംബ യൂനിറ്റിന്റെ നേതൃത്വത്തില്‍ ഈ സ്ഥലത്തെ കുറ്റിക്കാടുകള്‍ വെട്ടിവൃത്തിയാക്കുകയും ഈ സ്ഥലത്ത് മാലിന്യങ്ങള്‍ നിക്ഷേപിക്കരുത് എന്ന ബോര്‍ഡും സ്ഥാപിച്ചു. നെല്ലിക്കുഴി പഞ്ചായത്ത് അധികൃതര്‍ പ്രശ്‌നത്തില്‍ ഇടപെടണമെന്നും പ്രദേശത്തെ മാലിന്യങ്ങള്‍ കൃത്യമായി എടുത്തുകൊണ്ടുപോവാനുള്ള സംവിധാനങ്ങള്‍ പഞ്ചായത്ത് ഒരുക്കണമെന്നും പ്രദേശത്ത് മാലിന്യ സംസ്‌കരണപ്ലാന്റ് സ്ഥാപിക്കമെന്നുമാണ് നാട്ടുകാര്‍ ആവശ്യപ്പെടുന്നത്.