ബെയ്ജിങ്: ദക്ഷിണ ചൈനാ കടലിനു മുകളിലൂടെ വിമാനം പറത്തിയ യു.എസിന് ശക്തമായ മുന്നറിപ്പുമായി ചൈനയുടെ മിസൈല്‍ പരീക്ഷണം.
എയര്‍ക്രാഫ്റ്റ് കരിയര്‍ കില്ലര്‍ മാതൃകയിലുള്ളതടക്കം രണ്ടു മിസൈലുകളാണ് ദക്ഷിണ ചൈനാ കടലിലേക്ക് ചൈന തൊടുത്തുവിട്ടത്. ഇതോടെ ഇരുരാജ്യങ്ങളും തമ്മില്‍ നിലനില്‍ക്കുന്ന സംഘര്‍ഷാവസ്ഥ കൂടുതല്‍ രൂക്ഷമായി.
സൗത്ത് ചൈനാ മോണിങ് പോസ്റ്റാണ് ഇതുസംബന്ധിച്ച വാര്‍ത്ത പുറത്തുവിട്ടത്. തര്‍ക്ക പ്രദേശമായ പാരസെല്‍ ദ്വീപിനും ഹയ്‌നാന്‍ പ്രോവിന്‍സിനും ഇടയിലുള്ള പ്രദേശം ലക്ഷ്യമാക്കിയാണ് മിസൈല്‍ തൊടുത്തുവിട്ടതെന്നും റിപ്പോര്‍ട്ടില്‍ പറയുന്നു.
ദക്ഷിണ ചൈനാ കടലില്‍ ചൈന സൈനിക പരിശീലനം നടത്തുന്നതിനിടെ വ്യോമഗതാഗത നിരോധിത മേഖലയിലൂടെ യു.എസ് എയര്‍ക്രാഫ്റ്റ് പറത്തിയതിനുള്ള മറുപടിയായാണ് ചൈനയുടെ നടപടി. തങ്ങള്‍ നടത്തിയത് സാധാരണ നടത്താറുള്ള സൈനിക പരിശീലനം മാത്രമാണെന്നും യു.എസ് പ്രകോപനമുണ്ടാക്കുകയാണെന്നും ചൈന കഴിഞ്ഞ ദിവസം വ്യക്താക്കിയിരുന്നു.