ബാഴ്‌സലോണ: ലയണല്‍ മെസ്സി ബാഴ്‌സലോണ വിടുന്നുവെന്ന വാര്‍ത്തകള്‍ക്ക് ഇനിയും സ്ഥിരീകരണം ലഭിക്കാതെ കായിക ലോകം. അതേ സമയം മെസ്സി ബാഴ്‌സലോണയില്‍ തന്നെ തുടരുമെന്ന വാര്‍ത്തയും പുറത്ത് വരുന്നുണ്ട്. ഡെയിലി മെയിലാണ് ഇക്കാര്യം റിപ്പോര്‍ട്ട് ചെയ്തത്. തിങ്കളാഴ്ച ബാഴ്‌സലോണ ടീമിനൊപ്പം മെസ്സി പരിശീലനത്തിന് ഇറങ്ങുമെന്നാണ് റിപ്പോര്‍ട്ട്. പുതിയ പരിശീലകന്‍ റൊണാള്‍ഡ് കൊമാന് കീഴില്‍ ആദ്യമായി ബാഴ്‌സലോണ ടീം തിങ്കളാഴ്ച പരിശീലനത്തിന് ഇറങ്ങുകയാണ്. ഇതിനൊപ്പമായിരിക്കും മെസ്സി ഇറങ്ങുകയെന്നാണ് റിപ്പോര്‍ട്ടുകള്‍.

മെസ്സി ക്ലബ് വിടുകയാണെങ്കില്‍ ബാഴ്‌സലോണ നിയമപരമായി നീങ്ങും എന്നറിഞ്ഞത് കൊണ്ടാണ് താരം ക്ലബില്‍ നില്‍ക്കാന്‍ സന്നദ്ധനായതെന്നും റിപ്പോര്‍ട്ടുകളുണ്ട്. കഴിഞ്ഞ ദിവസം ബാഴ്‌സലോണ ബോര്‍ഡ് അടിയന്തിര യോഗം ചേര്‍ന്നിരുന്നു. ഇതില്‍ ക്ലബ് പ്രസിഡന്റ് ബര്‍തോമു രാജി സന്നദ്ധത അറിയിക്കുകയും ചെയ്തിരുന്നു. എന്നാല്‍ ബര്‍തോമു രാജിവെച്ചാലും മെസ്സി ക്ലബില്‍ നില്‍ക്കില്ലെന്നായിരുന്നു ആദ്യം പറഞ്ഞിരുന്നത്.
മെസ്സിയുടെ റിലീസ് ക്ലോസ് നല്‍കാനും വന്‍തുകക്ക് താരത്തെ ആര് സ്വന്തമാക്കുമെന്നും ഇതുവരെ വ്യക്തമായിട്ടില്ല. പെപ് ഗാര്‍ഡിയോളക്ക് കീഴില്‍ സിറ്റിയിലെത്തുമെന്ന വാര്‍ത്ത മാത്രമാണ് ഇപ്പോള്‍ പുറത്ത് വന്നിരിക്കുന്നത്. എന്നാല്‍ ഇതിനെ കുറിച്ച് സിറ്റിയുടെ അധികൃതര്‍ ഒന്നും അറിയിച്ചിട്ടില്ല. പുതിയ പരിശീലകന്‍ കൊമാനും മെസ്സി തുടരുമെന്ന് പ്രത്യാശ പ്രകടിപ്പിച്ചതായാണ് റിപ്പോര്‍ട്ടുകള്‍. ക്യാപ്റ്റനെന്ന നിലയില്‍ മെസ്സിയെ ബാഴ്‌സലോണക്ക് ആവശ്യമുണ്ടെന്നായിരുന്നു കൊമാന്റെ പ്രതികരണം.