ആലപ്പുഴ: പ്രളയത്തില്‍ 14,000 കിലോമീറ്റര്‍ റോഡ് തകര്‍ന്നതായി പൊതുമരാമത്ത് മന്ത്രി ജി. സുധാകരന്‍. കുട്ടനാട്ടിലെ പുനരധിവാസ പ്രവര്‍ത്തനങ്ങള്‍ വിലയിരുത്തുന്നതിന് കലക്ടറേറ്റില്‍ എത്തിയതായിരുന്നു അദ്ദേഹം. പ്രവര്‍ത്തനങ്ങളുടെ പുരോഗതി സംബന്ധിച്ച് ധനമന്ത്രി ടി.എം തോമസ് ഐസക്കുമായി അദ്ദേഹം ചര്‍ച്ച നടത്തി.
ആദ്യഘട്ടത്തില്‍ റോഡ് പഴയ രൂപത്തിലേക്ക് മാറ്റാനാണ് ശ്രദ്ധിക്കുക. അറ്റകുറ്റപ്പണി ചെയ്താല്‍ ശരിയാവുന്ന റോഡുകള്‍ക്ക് അതുചെയ്യാന്‍ നിര്‍ദേശിച്ചിട്ടുണ്ട്. തകര്‍ന്ന റോഡുകള്‍ പുനര്‍നിര്‍മിക്കുന്നതിന് 6,000 കോടി രൂപ വേണം.
ആലപ്പുഴ ചങ്ങനാശ്ശേരി റോഡിന്റെ അറ്റകുറ്റപ്പണികള്‍ കെ.എസ്.ടി.പി തന്നെ നടത്തും. കഴിഞ്ഞദിവസം ലോകബാങ്കുമായി കെ.എസ്.ടി.പി അധികൃതര്‍ ചര്‍ച്ച നടത്തിയിരുന്നു. പ്രത്യേക സാഹചര്യം കണക്കിലെടുത്ത് കെ.എസ്.ടി.പിയുടെ കൈവശമല്ലാത്ത ചില റോഡുകള്‍ ലോകബാങ്ക് സഹായത്താല്‍ ചെയ്യാമെന്ന് അവര്‍ അറിയിച്ചിട്ടുണ്ട്.
റോഡ് പുനര്‍നിര്‍മാണം വേഗത്തില്‍ നടക്കുന്നതിന് ചട്ടങ്ങളില്‍ ചില ഇളവുകള്‍ ആവശ്യമാണ്. ടെന്‍ഡര്‍ വിളിക്കുമ്പോള്‍ നിയോജക മണ്ഡലാടിസ്ഥാനത്തില്‍ വിളിക്കണം. അതാകുമ്പോള്‍ 140 ടെന്‍ഡര്‍ മതിയാകും. അല്ലെങ്കില്‍ ആയിരത്തിന് മുകളില്‍ ടെന്‍ഡര്‍ വേണ്ടിവരും. ഇത് കാലതാമസമുണ്ടാക്കും. ഇത്തരം കാര്യങ്ങള്‍ ധനമന്ത്രിയുമായി ചര്‍ച്ച ചെയ്തതായും സുധാകരന്‍ പറഞ്ഞു.