ന്യൂഡല്‍ഹി: ബാബാ രാംദേവിന്റെ നേതൃത്വത്തിലുള്ള പതഞ്ജലി കമ്പനി പുറത്തിറക്കിയ വിവാദമായ കൊറോണില്‍ മരുന്നിനെതിരായ കേസില്‍ പതഞ്ജലിക്ക് അനുകൂലമായ നിലപാടുമായി സുപ്രിംകോടതി. കൊറോണില്‍ എന്ന തങ്ങളുടെ ഉല്‍പന്നത്തിന്റെ പേരുപയോഗിക്കുന്നതില്‍നിന്നു പതഞ്ജലിയെ തടയണമെന്നാവശ്യപ്പെട്ട് ചെന്നൈയിലെ ആരുദ്ര എന്‍ജിനീയേഴ്‌സ് സമര്‍പ്പിച്ച ഹരജിയാണ് സുപ്രിംകോടതി തള്ളിയത്. കേസില്‍ മദ്രാസ് ഹൈക്കോടതിയുടെ വിധിക്കെതിരേ ഇടക്കാല ഉത്തരവ് പുറപ്പെടുവിക്കണമെന്ന ആവശ്യം സുപ്രിംകോടതി തള്ളുകയായിരുന്നു.
നേരത്തെ, കൊറോണില്‍ എന്ന പേരുപയോഗിക്കുന്നതില്‍നിന്നു മദ്രാസ് ഹൈക്കോടതിയുടെ സിംഗിള്‍ ബെഞ്ച് പതഞ്ജലിയെ തടഞ്ഞിരുന്നു. ട്രേഡ്മാര്‍ക്ക് ഉപയോഗിച്ചതിന് പത്തുലക്ഷം രൂപ പിഴയടയ്ക്കാനും ഉത്തരവിട്ടിരുന്നു. എന്നാല്‍, മദ്രാസ് ഹൈക്കോടതിയുടെ തന്നെ ഡിവിഷന്‍ ബെഞ്ച് ഈ ഉത്തരവ് സ്‌റ്റേ ചെയ്യുകയായിരുന്നു. ഇതിനെതിരേ ഇടക്കാല ഉത്തരവ് ആവശ്യപ്പെട്ടാണ് ആരുദ്ര എന്‍ജിനീയേഴ്‌സ് സുപ്രിംകോടതിയെ സമീപിച്ചിരുന്നത്. ഇതു തള്ളിയ ചീഫ് ജസ്റ്റിസ് എസ്.എ ബോബ്‌ഡെയുടെ നേതൃത്വത്തിലുള്ള സുപ്രിംകോടതി ബെഞ്ച്, വിഷയത്തില്‍ ഹൈക്കോടതിയില്‍ കേസ് തുടരാമെന്നും വ്യക്തമാക്കി.
കൊവിഡ് മാറ്റുമെന്ന രീതിയില്‍ പതഞ്ജലി പുറത്തിറക്കിയ കൊറോണില്‍ എന്ന പേരിലുള്ള മരുന്ന് നേരത്തെയും വിവാദമായിരുന്നു. കൃത്യമായ ക്ലിനിക്കല്‍ ട്രയല്‍ നടത്താതെയാണ് മരുന്ന് പുറത്തിറക്കിയതെന്ന ആരോപണത്തിനു പിന്നാലെ, ഈ മരുന്ന് നിരോധിച്ച് വിവിധ സംസ്ഥാനങ്ങള്‍ രംഗത്തെത്തുകയും ചെയ്തിരുന്നു.