തിരുവനന്തപുരം: സംസ്ഥാനത്തു കഴിഞ്ഞ മാസം കൊവിഡ് ബാധിച്ചു മരിച്ചവരില്‍ ആറു ശതമാനം പേര്‍ക്കു മാത്രമാണ് മറ്റു രോഗങ്ങളൊന്നുമില്ലാതിരുന്നതെന്ന് ആരോഗ്യവകുപ്പിന്റെ ഡെത്ത് ഓഡിറ്റ് കമ്മിറ്റിയുടെ റിപ്പോര്‍ട്ട്.

കൂടുതല്‍ പേര്‍ക്കും പ്രമേഹവും രക്തസമ്മര്‍ദവുമുണ്ടായിരുന്നു. ആകെ 63 പേരുടെ മരണമാണ് ജൂലൈ മാസത്തിലെ ഓഡിറ്റിങിന് പരിഗണിച്ചത്. ഇതില്‍ 51 പേരുടെ മരണം കൊവിഡ് മൂലമാണെന്ന് കമ്മിറ്റി സ്ഥിരീകരിച്ചു. ഏഴു പേരുടെ മരണകാരണം കൊവിഡ് അല്ലെന്നും വിലയിരുത്തി. നാലുകേസുകളില്‍ പോസ്റ്റ്‌മോര്‍ട്ടം റിപ്പോര്‍ട്ട് വരാനുണ്ട്. ഒരു കേസ് തമിഴ്‌നാട് സ്വദേശിയാണ്.
കൊവിഡ് മരണം സ്ഥിരീകരിച്ച 51 കേസുകളില്‍ മൂന്നു പേര്‍ക്കു മാത്രമാണ് മറ്റു രോഗങ്ങളൊന്നുമില്ലാതിരുന്നത്.

പ്രമേഹബാധിതരായിരുന്ന 35 പേരും രക്തസമ്മര്‍ദമുണ്ടായിരുന്ന 33 പേരുമുണ്ടായിരുന്നു. ആറു പേര്‍ കാന്‍സര്‍ ബാധിതരുമായിരുന്നു. മരണപ്പെട്ടവരില്‍ 44 പേര്‍ക്ക് പ്രത്യേകം യാത്ര പശ്ചാത്തലങ്ങളില്ലായിരുന്നു. ഏഴു ശതമാനം പേര്‍ക്കു മാത്രമാണ് യാത്രാ പശ്ചാത്തലമുണ്ടായിരുന്നത്.
മരണപ്പെട്ടവരില്‍ കൂടുതല്‍ പേരും 60നും 79നും ഇടയില്‍ പ്രായമുള്ളവരായിരുന്നു (29 പേര്‍). 40നും 59നുമിടയില്‍ പ്രായമുള്ള 14 പേരും 80ന് മുകളില്‍ പ്രായമുള്ള ആറുപേരും 20നും 39നുമിടയില്‍ പ്രായമുള്ള രണ്ടു പേരും കഴിഞ്ഞമാസം മരണപ്പെട്ടവരില്‍പ്പെടുന്നു.

ജില്ലാടിസ്ഥാനത്തില്‍ കഴിഞ്ഞ മാസം എറണാകുളത്തുനിന്നാണ് ഏറ്റവും കൂടുതല്‍ മരണം റിപ്പോര്‍ട്ട് ചെയ്തത് - 13 മരണം. തിരുവനന്തപുരം- എട്ട്, കാസര്‍കോട് -ആറ്, കൊല്ലം, തൃശൂര്‍ -നാല് വീതം, മലപ്പുറം -മൂന്ന്, ആലപ്പുഴ,കണ്ണൂര്‍ -രണ്ട് വീതം, ഇടുക്കി,കോട്ടയം, പാലക്കാട് -ഒന്ന് വീതം എന്നിങ്ങനെയാണ് മറ്റു ജില്ലകളിലെ കണക്കുകള്‍.