തിരുവനന്തപുരം: സാക്ഷരതാമിഷന്‍ ആരംഭിച്ച മൂന്ന് ആദിവാസി സാക്ഷരതാ പദ്ധതികളില്‍ കഴിഞ്ഞ രണ്ടുവര്‍ഷത്തിനിടെ സാക്ഷരത നേടിയത് 9,975 പേര്‍. 2015-17 കാലഘട്ടവുമായി താരതമ്യം ചെയ്യുമ്പോള്‍ ആദിവാസി മേഖലകളില്‍ സാക്ഷരത നേടിയവരുടെ എണ്ണത്തില്‍ ഒന്‍പത് ഇരട്ടിയാണ് വര്‍ധിച്ചത്.
2015-17 കാലഘട്ടത്തില്‍ 1117 പേര്‍ മാത്രമായിരുന്നു ആദിവാസി മേഖലകളില്‍ സാക്ഷരത നേടിയത്. വയനാട് സാക്ഷരതാ തുല്യതാ പദ്ധതിയില്‍ 4309, അട്ടപ്പാടി സാക്ഷരതാ തുല്യതാ പദ്ധതിയില്‍ 3670, വിദ്യാഭ്യാസപരമായി ഏറെ പിന്നാക്കം നില്‍ക്കുന്ന സംസ്ഥാനത്തെ 100 ആദിവാസി കോളനികളില്‍ ആരംഭിച്ച സമഗ്ര പദ്ധതിയില്‍ 1996 എന്നിങ്ങനെയാണ് മൊത്തം 9,975 പേര്‍ സാക്ഷരത നേടിയത്. ഇതില്‍ 7565 പേര്‍ സ്ത്രീകളാണ്. അട്ടപ്പാടിയിലെ പ്രത്യേക സാക്ഷരതാ തുല്യതാ പദ്ധതിയുടെ മൂന്നാംഘട്ടം ഇപ്പോള്‍ നടന്നുവരികയാണ്. 1763 പേരാണ് സാക്ഷരതാ ക്ലാസില്‍ പഠിച്ചുവരുന്നത്. വയനാട്ടിലെ രണ്ടാംഘട്ട സാക്ഷരതാ പദ്ധതിയില്‍ 5342 പേരും സമഗ്രയില്‍ 2720 പേരും പഠിച്ചുവരുന്നു.
അട്ടപ്പാടിയിലെ മൊത്തം 192 ഊരുകളിലായി സാക്ഷരതാമിഷന്‍ നടത്തിയ സര്‍വേയില്‍ മൊത്തം 5031 നിരക്ഷരരെയാണ് കണ്ടെത്തിയത്. ഇതില്‍ ഒന്നാംഘട്ടത്തില്‍ 1117, രണ്ടാംഘട്ടത്തില്‍ 2553 എന്നിങ്ങനെ മൊത്തം 3670 പേരെ സാക്ഷരരാക്കി. അവശേഷിക്കുന്ന 1361 പേരെ സാക്ഷരരാക്കുന്നതിനായാണ് മൂന്നാംഘട്ട പ്രവര്‍ത്തനങ്ങള്‍ നടത്തി വരുന്നത്. അടുത്ത വര്‍ഷം ജൂണ്‍ മാസത്തോടെ അട്ടപ്പാടിയെ സമ്പൂര്‍ണ സാക്ഷരതാ ബ്ലോക്കായി പ്രഖ്യാപിക്കാനാണ് സാക്ഷരതാ മിഷന്‍ ലക്ഷ്യമിടുന്നത്.