തൃശൂര്‍: പ്രളയത്തെ തുടര്‍ന്ന് പള്ളി മുങ്ങിയപ്പോള്‍ ബലിപെരുന്നാള്‍ നിസ്‌കാരത്തിനായി ഭജനാലയം വിട്ടുനല്‍കിയ കൊച്ചുകടവ് എരവത്തൂര്‍ പുറപ്പിള്ളിക്കാവ് രക്തേശ്വരി ക്ഷേത്രം യൂത്ത് ലീഗ് ദേശീയ പ്രസിഡന്റ് സാബിര്‍ എസ്. ഗഫാര്‍ സന്ദര്‍ശിച്ചു.
രാജ്യത്ത് നഷ്ടപ്പെട്ടു കൊണ്ടിരിക്കുന്ന മത സൗഹാര്‍ദം വീണ്ടെടുക്കാന്‍ മറ്റുള്ളവര്‍ക്ക് പ്രചോദനമാകുന്ന ഉത്തമ മാതൃകയാണ് ക്ഷേത്ര ഭാരവാഹികളില്‍ നിന്നുണ്ടായതെന്ന് അദ്ദേഹം പറഞ്ഞു. നാരായണ ഗുരു ഉയര്‍ത്തിപിടിച്ച മൂല്യങ്ങള്‍ കൈവിടാതെ കാത്ത് സൂക്ഷിക്കാന്‍ അദ്ദേഹത്തിന്റെ അനുയായികള്‍ ഇപ്പോഴും ശ്രമിക്കുന്നു എന്നതിന്റെ നേര്‍സാക്ഷ്യമാണ് ക്ഷേത്രത്തിന്റെ സ്ഥലത്ത് നിസ്‌കാരത്തിന് സഹായം ചെയ്ത് കൊടുത്തതിലൂടെ വ്യക്തമാകുന്നതെന്ന് അദ്ദേഹം പറഞ്ഞു.
യൂത്ത് ലീഗ് സംസ്ഥാന ജില്ലാ നേതാക്കള്‍ക്കൊപ്പമെത്തിയ സാബിര്‍ എസ്. ഗഫാറിനെ ക്ഷേത്ര സന്നിധിയില്‍ ഭാരവാഹികളായ പി.പി പ്രിയാര്‍ജി, വി.പി പ്രഹ്‌ളാദന്‍, പി.കെ സാബു, ബി.കെ വിബീഷ്, പി.പി ഉണ്ണികൃഷ്ണന്‍, എ.കെ മോഹനന്‍ എന്നിവര്‍ ചേര്‍ന്ന് സ്വീകരിച്ചു. യൂത്ത് ലീഗ് സംസ്ഥാന വൈസ് പ്രസിഡന്റ് പി.എ അഹ്മദ് കബീര്‍, തൃശൂര്‍ ജില്ലാ പ്രസിഡന്റ് കെ.കെ അഫ്‌സല്‍, എറണാകുളം ജില്ലാ പ്രസിഡന്റ് കെ.എ മുഹമ്മദ് ആസിഫ്, ജനറല്‍ സെക്രട്ടറി അന്‍സാര്‍ മുണ്ടാട്ട്, ദേശീയ കമ്മിറ്റി അംഗങ്ങളായ ബാബു ചേളാരി, അഡ്വ. വി.കെ റഫീഖ്, എം.എസ്.എഫ് ജില്ലാ പ്രസിഡന്റ് അല്‍ റസിന്‍ എന്നിവര്‍ സന്നിഹിതരായിരുന്നു.