ഫറോക്ക്: ബേപ്പൂര്‍ പൊലിസ് സ്റ്റേഷന് മുന്നിലെ കാട് കാല്‍നട യാത്രക്കാര്‍ക്ക് ദുരിതമാകുന്നു. അനധികൃത മണല്‍ക്കടത്തിനും മറ്റുമായി പൊലിസ് പിടിച്ചെടുത്ത വാഹനങ്ങളിലും പരിസരത്തുമായാണ് കാട് പടര്‍ന്നു പന്തലിച്ചു നില്‍ക്കുന്നത്. സ്റ്റേഷനിലേക്കുള്ള വഴിയും കാടു മൂടികിടക്കുകയാണ്.
പോര്‍ട്ട് റോഡ് ജങ്ഷന്‍ മുതല്‍ പൊലിസ് സ്റ്റേഷന്‍ വരെ പൊലിസ് പിടിച്ചെടുത്ത വാഹനങ്ങള്‍ നിരന്നിട്ടുണ്ട്. തുരുമ്പെടുത്ത വാഹനങ്ങള്‍ കാട് നിറഞ്ഞ് കിടക്കുകയാണ്. പ്രദേശം തെരുവുനായകളുടെ വിഹാര കേന്ദ്രവുമാണ്. കൂടാതെ ഇഴജന്തുക്കളുടെ ശല്യവും വര്‍ധിച്ചിട്ടുണ്ട്. ബേപ്പൂര്‍ പോര്‍ട്ടിലേക്കുള്ള വഴി കൂടിയാണിത്. ജങ്കാര്‍ ഇറങ്ങി സ്‌കൂള്‍ വിദ്യാര്‍ഥികളടക്കമുള്ളവര്‍ യാത്ര ചെയ്യുന്നതും ഇതുവഴിയാണ്.