മലപ്പുറം: തദ്ദേശ സ്വയംഭരണ തെരഞ്ഞെടുപ്പ് ആസന്നമായ സാഹചര്യത്തില്‍ പ്രതിപക്ഷ നേതാവ് രമേശ് ചെന്നിത്തല പാണക്കാട്ടെത്തി സയ്യിദ് ഹൈദരലി ശിഹാബ് തങ്ങളുമായി ചര്‍ച്ച നടത്തി. പി.കെ കുഞ്ഞാലിക്കുട്ടി എം.പി, സയ്യിദ് സാദിഖലി ശിഹാബ് തങ്ങള്‍, കെ.പി.എ മജീദ്, സയ്യിദ് മുനവറലി ശിഹാബ് തങ്ങള്‍ എന്നിവര്‍ പങ്കെടുത്തു.
വൈകിട്ട് പാണക്കാട് നടന്ന ചര്‍ച്ചയില്‍ നിലവിലെ രാഷ്ട്രീയ സാഹചര്യങ്ങള്‍ വിലയിരുത്തി. യു.ഡി.എഫിന് വളരെ അനുകൂലമായ രാഷ്ട്രീയ സാഹചര്യമാണുള്ളതെന്ന് വിലയിരുത്തിയ നേതാക്കള്‍ തദ്ദേശ തെരഞ്ഞെടുപ്പിന് സ്വീകരിക്കേണ്ട സമീപനങ്ങളെക്കുറിച്ചും ചര്‍ച്ച ചെയ്തു. പ്രതിപക്ഷത്തിന്റെ പ്രവര്‍ത്തനങ്ങളില്‍ സയ്യിദ് ഹൈദരലി തങ്ങള്‍ സംതൃപ്തി രേഖപ്പെടുത്തി.
ഇടതു സര്‍ക്കാരിന്റെ അഴിമതി തുറന്നുകാട്ടുന്നതിലും അവിശ്വാസ പ്രമേയത്തിലൂടെ ഇതു പൊതുജനങ്ങള്‍ക്കിടയില്‍ ചര്‍ച്ചയാക്കുന്നതിലും പ്രതിപക്ഷം വിജയിച്ചു.
അഴിമതിക്കെതിരേ സഭയിലും പുറത്തും യു.ഡി.എഫിന്റെ പോരാട്ടങ്ങള്‍ക്ക് മികച്ച നേതൃത്വം നല്‍കാന്‍ രമേശ് ചെന്നിത്തലക്കും യു.ഡി.എഫ് നേതാക്കള്‍ക്കും സാധിച്ചെന്നും ഹൈദരലി തങ്ങള്‍ പറഞ്ഞു.