ലഖ്‌നൗ: യുവാവിനെ തട്ടിക്കൊണ്ടുപോയി തോക്കു ചൂണ്ടി ഭീഷണിപ്പെടുത്തി കവര്‍ച്ച നടത്തിയ കേസില്‍ യു.പി പൊലിസ് കോണ്‍സ്റ്റബിള്‍ അറസ്റ്റില്‍. കോണ്‍സ്റ്റബിള്‍ ശ്രീകാന്ത് (30) ആണ് കൂട്ടാളികളോടൊപ്പം അറസ്റ്റിലായത്.
ഇയാളുടെ കൂട്ടാളിയായ രഘു ഖോസ്ല നൂറിലധികം കേസുകളിലെ പ്രതിയാണ്. ഓഗസ്റ്റ് 17 നാണ് തട്ടിക്കൊണ്ടുപോകല്‍, കൊള്ളയടിക്കല്‍ സംഭവം നടന്നത്. സോണിപത് നിവാസിയായ കര്‍ണാലിനെയാണ് കൊള്ളയടിച്ചത്. മുകര്‍ബ ചൗക്കില്‍ കാറില്‍ സുഹൃത്തിനെ കാത്തിരിക്കുന്നതിനിടയില്‍ എത്തിയ രണ്ടുപേര്‍ ഡോര്‍ തുറക്കാന്‍ ആവശ്യപ്പെടുകയും തോക്കു ചൂണ്ടി ഭീഷണിപ്പെടുത്തുകയുമായിരുന്നു. ഉടന്‍ തന്നെ കാറിലെത്തിയ പ്രതികള്‍ കര്‍ണാലിനെ തട്ടിക്കൊണ്ടുപോയി മൊബൈല്‍ ഫോണും പണവും കവര്‍ന്നശേഷം വഴിയില്‍ തള്ളി. കവര്‍ച്ച ചെയ്യപ്പെട്ട മൊബൈല്‍ ഫോണ്‍ ശ്രീകാന്തില്‍നിന്നു കണ്ടെടുത്തതായും പൊലിസ് അറിയിച്ചു.