മോസ്‌കോ: ലോകത്തെ ഏറ്റവും വിനാശകാരിയായ ഹൈഡ്രജന്‍ ബോംബായ സാര്‍ ബോംബിന്റെ പരീക്ഷണ വിഡിയോ ദൃശ്യം പുറത്തുവിട്ട് റഷ്യ.
ജപ്പാനിലെ ഹിരോഷിമയെ നക്കിത്തുടച്ച അണുബോംബിന്റെ 3333 മടങ്ങ് ശക്തിയുണ്ട് ഇതിനെന്ന് പ്ലഡ്ജ് ടൈംസ് റിപ്പോര്‍ട്ട് ചെയ്തു. ശീതയുദ്ധത്തിനിടെ 1961 ഒക്ടോബര്‍ 30ന് ആര്‍ട്ടിക് സമുദ്രത്തിലെ ബാരന്റ് കടലിലായിരുന്നു രഹസ്യമായി സാര്‍ ബോംബ് പരീക്ഷിച്ചത്. റഷ്യന്‍ ആണവോര്‍ജ ഏജന്‍സിയായ റോസറ്റോമിന്റെ 75ാം വാര്‍ഷികത്തോടനുബന്ധിച്ചാണ് വിഡിയോ പുറത്തുവിട്ടത്. 30 മിനുട്ട് ദൈര്‍ഘ്യമുള്ള ഡോക്യുമെന്ററിയില്‍ ബോംബ് പരീക്ഷണത്തിന്റെ വിശദാംശങ്ങളെല്ലാമുണ്ട്.
ഈ ബോംബ് ഡല്‍ഹി പോലൊരു നഗരത്തിലാണ് പതിക്കുന്നതെങ്കില്‍ നഗരമാകെ ചാരമാവുകയും പാകിസ്താനില്‍ വരെ അണുവികിരണമുണ്ടാവുകയും ചെയ്യും. ആര്‍ട്ടിക് സമുദ്രത്തിലെ നൊവായ ഗെമാല്‍യയിലെ മഞ്ഞുപാളിയിലായിരുന്നു പരീക്ഷണം. പടിഞ്ഞാറന്‍ രാജ്യങ്ങളാണിതിന് സാര്‍ ബോംബെന്ന് പേരിട്ടത്.
എന്നാല്‍ ആര്‍.ഡി.എസ്-220 എന്നായിരുന്നു റഷ്യന്‍ സൈന്യം ഇതിനിട്ട പേര്. റോസറ്റോം യൂടൂബ് ചാനലിലാണ് ഇതിന്റെ വിഡിയോ പ്രസിദ്ധീകരിച്ചത്. നൂറുകണക്കിന് മൈല്‍ അകലെവച്ചാണ് കാമറകള്‍ ഈ ദൃശ്യം പകര്‍ത്തിയത്. ഈ ആണവപരീക്ഷണത്തിനു ശേഷമാണ് റഷ്യയും യു.എസും 1963ല്‍ തുറസായ സ്ഥലത്ത് ആണവപരീക്ഷണം നടത്തുന്നത് തടയുന്ന കരാറില്‍ ഒപ്പുവച്ചത്. തുടര്‍ന്ന് ഭൂഗര്‍ഭ പരീക്ഷണമാണ് ഇരു രാജ്യങ്ങളും നടത്തുന്നത്.
1952ല്‍ ഹിരോഷിമ ബോംബിന്റെ 700 മടങ്ങ് ശക്തിയുള്ള ഹൈഡ്രജന്‍ ബോംബ് അമേരിക്ക പരീക്ഷിച്ചിരുന്നു.