പത്തനാപുരം: കിഴക്കന്‍ മലയോര മേഖല വീണ്ടും പുലിപ്പേടിയില്‍. കഴിഞ്ഞ ദിവസം പുലിയിറങ്ങി വളത്തു നായയെ പിടികൂടി കൊന്നു. ചമ്പനരുവി മുള്ളുമല മായാവിലാസത്തില്‍ രഘുനാഥന്റെ വളര്‍ത്തുനായയെയാണ് പുലി പിടികൂടിയത്. വീടിന്റെ സിറ്റൗട്ടില്‍ കെട്ടിയിരുന്ന വളര്‍ത്തുനായയെയാണ് കഴിഞ്ഞ ദിവസം രാത്രിയില്‍ പുലി കൊന്നുതിന്നത്.
വീട്ടുകാര്‍ പുലര്‍ച്ചെ എഴുന്നേറ്റപ്പോള്‍ നായയുടെ അവശിഷ്ടം കണ്ട് നടത്തിയ തെരച്ചിലിലാണ് മുറ്റത്ത് പുലിയുടെ കാല്‍പാടുകളും കണ്ടെത്തിയത്. തുടര്‍ന്ന് വനപാലകരെ വിവരമറിയിക്കുകയായിരുന്നു. വനമേഖലയോട് ചേര്‍ന്നുള്ള ജനവാസകേന്ദ്രങ്ങളില്‍ ഏറെ കാലമായി വന്യമൃഗങ്ങളുടെ ശല്യം രൂക്ഷമാണ്. വൈദ്യുതി വേലികളും, കിടങ്ങുകളും സ്ഥാപിക്കണമെന്നുള്ള നാട്ടുകാരുടെ ആവശ്യത്തിന് പഴക്കമേറെയാണ്.