മുംബൈ: ഭീമകൊറെഗാവ് കേസില്‍ പ്രതി ചേര്‍ക്കപ്പെട്ട് ജയിലില്‍ കഴിയുന്ന മനുഷ്യാവകാശ പ്രവര്‍ത്തക പ്രൊഫ. സുധ ഭരദ്വാജിന്റെ ജാമ്യാപേക്ഷ ബോംബേ ഹെക്കോടതി തള്ളി. കടുത്ത പ്രമേഹവും ഹൃദ്രോഗവുമുള്ള തനിക്ക് ചികിത്സാ ആവശ്യാര്‍ഥം ജാമ്യം അനുവദിക്കണമെന്നായിരുന്നു ഇവരുടെ ആവശ്യം. ഒട്ടേറെ ആരോഗ്യപ്രശ്‌നങ്ങളുള്ള തനിക്ക് ജയിലില്‍വച്ച് കൊവിഡ് പിടിപെടാന്‍ സാധ്യതയുണ്ടെന്നും ഇവര്‍ അപ്പീലില്‍ ചൂണ്ടിക്കാണിച്ചിരുന്നു. എന്നാല്‍ ഇവരുടെ ഹരജി തള്ളിയ കോടതി ജയിലില്‍ സര്‍ക്കാര്‍ ചെലവില്‍ ചികിത്സ തുടരണമെന്നും നിര്‍ദേശിച്ചു.
ഇടക്കാല ജാമ്യം അനുവദിക്കണമെന്നാവശ്യപ്പെട്ട് സമര്‍പ്പിച്ച ഹരജി എന്‍.ഐ.എ കോടതി തള്ളിയതിനെത്തുടര്‍ന്നാണ് സുധ ഭരദ്വാജ് ബോംബെ ഹൈക്കോടതിയെ സമീപിച്ചത്. സുധ ഭരദ്വാജിന്റെ ആരോഗ്യസ്ഥിതി തൃപ്തികരമാണെന്ന് ജെയില്‍ മെഡിക്കല്‍ ഓഫിസര്‍ കോടതിയില്‍ റിപ്പോര്‍ട്ട് സമര്‍പ്പിച്ചിരുന്നു. ഇതു ചൂണ്ടിക്കാട്ടിയാണ് കോടതി ജാമ്യാപേക്ഷ തള്ളിയത്.
കേസില്‍ ജയിലില്‍ കഴിയുന്ന സുധ ബരദ്വാജ് ഡോ. ആനന്ദ് തെല്‍തുംബ്‌ഡേ, വെര്‍ണന്‍ ഗൊണ്‍സാല്‍വസ് എന്നിവരുടെ ആരോഗ്യനില സംബന്ധിച്ച റിപ്പോര്‍ട്ട് കുടുംബാംഗങ്ങള്‍ക്കും അഭിഭാഷകര്‍ക്കും ദേശീയ അന്വേഷണ ഏജന്‍സിക്കും നല്‍കണമെന്ന് ബോംബെ ഹൈക്കോടതി കഴിഞ്ഞ ദിവസം സംസ്ഥാന സര്‍ക്കാരിന് നിര്‍ദേശം നല്‍കിയിരുന്നു. ഇവരോടൊപ്പം ജയിലില്‍കഴിയുന്ന വരവരറാവുവിന് നേരത്തെ കൊവിഡ് സ്ഥിരീകരിച്ചിരുന്നു.