മേപ്പാടി: മേപ്പാടി-ചുണ്ടേല്‍ റോഡ് 46ല്‍ കിണര്‍ ഇടിഞ്ഞു താഴുന്നു.
കൊടിയന്‍ വീട്ടില്‍ ജോണ്‍സന്റെ വീട്ടിലെ 58 റിങുള്ള കിണറാണ് പൂര്‍ണമായും താഴ്ന്നുപോയത്. ഏകദേശം 14 അടിയോളം താഴ്ചയിലേക്കാണ് കിണര്‍ താഴ്ന്നത്. സമീപത്തെ വീടുകളില്‍ വന്‍തോതില്‍ വിള്ളലുകളും രൂപപ്പെട്ടിട്ടുണ്ട്. ജോണ്‍സന്റെ സമീപത്ത് താമസിക്കുന്ന ചേമ്പട്ടി ആമിനയുടെ വീട്ടിലും വിള്ളല്‍ രൂപപ്പെട്ടിട്ടുണ്ട്. ഭൂമിക്കടിയിലൂടെയുള്ള ശക്തമായ നീരൊഴുക്കായിരിക്കാം പ്രതിഭാസത്തിന് കാരണമെന്നാണ് വിദഗ്ദ്ധരുടെ അഭിപ്രായം. ഇതിന് അഭിമുഖമായി ഏകദേശം ഒരു കിലോമീറ്റര്‍ അപ്പുറം കല്‍പ്പറ്റ- മേപ്പാടി റോഡില്‍ വിയ്യനാടന്‍ റഷീദിന്റെ വീട്ടിലെ ചുമരുകളും അടര്‍ന്നു വീഴാറായ നിലയിലാണ്. അധികൃതരെ വിവരം അറിയിച്ചിട്ടുണ്ട്.