മലപ്പുറം: കോടതി ഉത്തരവ് പോലും മാനിക്കാതെ അധ്യാപകദ്രോഹ നിലപാടുമായി മലപ്പുറം ഡിഡിഇ ഓഫീസ് മുന്നോട്ടു പോകുന്നു എന്നാരോപിച്ച് പ്രതിപക്ഷ അധ്യാപക സംഘടനയായ കെ.പിഎസ്ടിഎ പ്രക്ഷോഭത്തിലേക്ക്. എസ്എസ്എയില്‍ നിന്ന് ഡെപ്യൂട്ടേഷന്‍ കഴിഞ്ഞെത്തിയ സംഘടനയുടെ ജില്ലാ സെക്രട്ടറി ടി.ടി റോയ് തോമസിന് നല്‍കിയ പുനര്‍ നിയമന ഉത്തരവ് 24 മണിക്കൂര്‍ തികയും മുമ്പ് പിന്‍വലിച്ച സാഹചര്യത്തിലും പിന്‍വലിച്ച ഉത്തരവ് സ്റ്റേ ചെയ്തു കൊണ്ടുള്ള കോടതി ഉത്തരവ് നടപ്പിലാക്കാന്‍ വിസമ്മതിക്കുന്ന സാഹചര്യത്തിലുമാണ് സംഘടന പ്രക്ഷോഭത്തിലേക്ക് നീങ്ങുന്നത്. ജൂണ്‍ 30ന് ഡെപ്യൂട്ടേഷന്‍ അവസാനിപ്പിച്ച് പാരന്റ് ഡിപ്പാര്‍ട്ട്‌മെന്റിലേക്ക് മടങ്ങണമെന്ന് ജൂണ്‍ 29ന് ഉത്തരവിറങ്ങിയതിന്റെ അടിസ്ഥാനത്തിലാണ് പാരന്റ് പുനര്‍നിയമനം തേടി നാലു ബിപിഒമാര്‍ ഡിഡിഇയെ സമീപിച്ചത്. ഇക്കഴിഞ്ഞ നാലാം തിയ്യതി ഇവര്‍ക്ക് പുനര്‍ നിയമനം നല്‍കി ഡിഡിഇ ഉത്തരവിടുകയും ചെയ്തു. എന്നാല്‍ ഇതിലൊരാളായ കെപിഎസ്ടിഎ ജില്ലാ സെക്രട്ടറിയുടെ നിയമനം തൊട്ടടുത്ത ദിവസം തന്നെ ഡിഡിഇ റദ്ദ് ചെയ്തതാണ് പ്രശ്‌നത്തിന്റെ തുടക്കം. അരീക്കോട് ഉപജില്ലയിലെ മൈത്ര ജിയുപിഎസിലെ ഹെഡ്മാസ്റ്ററായിട്ടാണ് റോയ് തോമസിന് നിയമനം നല്‍കിയത്. ഒന്‍പതു വര്‍ഷത്തെ ഹെഡ്മാസ്റ്റര്‍ സര്‍വ്വീസുള്ള റോയ് തോമസിന്റെ സ്ഥാനത്തേക്ക് ഒരു വര്‍ഷം മാത്രം സര്‍വീസുള്ള ഭരണപക്ഷ അധ്യാപക സംഘടനയില്‍ അംഗമായ ഒരധ്യാപകനെ നിയമിച്ചുകൊണ്ട് കെപിഎസ്ടിഎ ജില്ലാ സെക്രട്ടറിയെ അപമാനിക്കുകയും രാഷ്ട്രീയ വിരോധം തീര്‍ക്കുകയുമാണുണ്ടായതെന്ന് ഭാരവാഹികള്‍ വാര്‍ത്താസമ്മേളനത്തില്‍ ആരോപിച്ചു. ഭരണപക്ഷ അധ്യാപക സംഘടനയുടെ രാഷ്ട്രീയ താല്‍പര്യത്തിനു വഴങ്ങി അധ്യാപകരെ ദ്രോഹിക്കുന്ന നിലപാടിയില്‍ നിന്ന് ഡിഡിഇ പിന്‍മാറണമെന്ന് ഭാരവാഹികളായ ജോര്‍ജ് കൊളത്തൂര്‍, എം.ക സനല്‍കുമാര്‍, കെ.അബ്ദുല്‍ മജീദ്, മുനവ്വര്‍ റഹ്മാന്‍ പനോളി എന്നിവര്‍ പറഞ്ഞു.