കുമ്പള: മൊഗ്രാല്‍ പുത്തൂര്‍ അഴിമുഖം മണല്‍തിട്ട രൂപപ്പെട്ട് അടഞ്ഞതിനെ തുടര്‍ന്ന് പുഴയോരത്തെ വീടുകള്‍ വെള്ളപ്പൊക്ക ഭീഷണിയില്‍. നിരവധി വീടുകളില്‍ വെള്ളം കയറി. മൊഗര്‍, പടിഞ്ഞാര്‍ എന്നിവിടങ്ങളിലാണ് ഇന്നലെ രാവിലെ വെള്ളം കയറിയത്. മൊഗ്രാല്‍പുത്തൂര്‍ കടവത്തെയും മൊഗറിലെയും റോഡുകളില്‍ വെള്ളം കയറിയതിനാല്‍ റോഡും പുഴയും തിരിച്ചറിയാന്‍ കഴിയാത്ത അവസ്ഥയാണ്. സമീപത്തെ കൃഷിയിടങ്ങളും വെള്ളത്തിനടിയിലായി. കൂടാതെ കടവത്തെ പാതയോരത്തുള്ള ട്രാന്‍സ്‌ഫോര്‍മറും വെള്ളത്തിനടിയിലായി. ഇത് വന്‍ അപകടഭീഷണിയാണ് ഉയര്‍ത്തുന്നത്.
അതേസമയം നാട്ടുകാരും മണല്‍ തൊഴിലാളികളും അഴി നീക്കം ചെയ്യാന്‍ ശ്രമം ആരംഭിച്ചു. വെള്ളപ്പൊക്ക ഭീഷണി നേരിടുന്ന പ്രദേശങ്ങള്‍ കുഡ്‌ലു വില്ലേജ് ഓഫിസറുടെ നേതൃത്വത്തില്‍ സന്ദര്‍ശനം നടത്തി.