തിരുവനന്തപുരം: ലോക്‌സഭാ തെരഞ്ഞെടുപ്പില്‍ തിരുവനന്തപുരത്തും പത്തനംതിട്ടയിലും ആര്‍ക്ക് വോട്ട് ചോരുമെന്ന വേവലാതിയിലാണ് മുന്നണികള്‍. രണ്ടിടത്തും എന്‍.ഡി.എ സ്ഥാനാര്‍ഥികള്‍ കരുത്തരായതിനാല്‍ യു.ഡി.എഫ്- എല്‍.ഡി.എഫ് മുന്നണികള്‍ക്കുള്ളില്‍ ആശങ്കയുണ്ട്.
മുന്‍പില്ലാത്ത കടുത്ത ത്രികോണ മത്സരത്തിനാണ് തിരുവനന്തപുരം മണ്ഡലം ഇത്തവണ വേദിയായത്. ബി.ജെ.പിക്ക് സ്വാധീനമുള്ള മണ്ഡലമായതിനാല്‍ ഇവിടെ അക്കൗണ്ട് തുറക്കാമെന്നാണ് എന്‍.ഡി.എയുടെ കണക്കുകൂട്ടല്‍.

തിരുവനന്തപുരം, കഴക്കൂട്ടം, വട്ടിയൂര്‍ക്കാവ്, നേമം അസംബ്ലി മണ്ഡലങ്ങളില്‍ കഴിഞ്ഞ തവണ ബി.ജെ.പി മുന്നിലായിരുന്നു. അതിനാല്‍ ബാക്കിയുള്ള മണ്ഡലങ്ങളായ കോവളം, പാറശാല, നെയ്യാറ്റിന്‍കര എന്നിവിടങ്ങളിലെ ഹിന്ദുവോട്ടുകള്‍ കൂടി അനുകൂലമാക്കാനുള്ള പ്രവര്‍ത്തനങ്ങളാണ് ഇത്തവണ എന്‍.ഡി.എ നടത്തിയത്.
അതേസമയം, യു.ഡി.എഫ് സ്ഥാനാര്‍ഥി ശശി തരൂരിന് മണ്ഡലം എങ്ങനെയെങ്കിലും നിലനിര്‍ത്തിയേ മതിയാകൂ. വിജയസാധ്യതയുള്ള ഇവിടെ വോട്ട് കുറഞ്ഞാല്‍ അത് യു.ഡി.എഫിനെ കാര്യമായി ബാധിക്കും. എല്‍.ഡി.എഫ് സ്ഥാനാര്‍ഥി സി. ദിവാകരനും ഇവിടെ വിജയിക്കേണ്ടത് അത്യാവശ്യമായി മാറിയിരിക്കുകയാണ്. കഴിഞ്ഞ തവണത്തെ പേയ്‌മെന്റ് സീറ്റ് വിവാദത്തിന്റെ നാണക്കേട് എങ്ങനെയും മറികടക്കണമെന്നതിനാല്‍ ശക്തമായ തെരഞ്ഞെടുപ്പ് പ്രവര്‍ത്തനങ്ങളാണ് ഇവിടെ എല്‍.ഡി.എഫ് കാഴ്ചവച്ചത്.
ശബരിമല വിഷയത്തിന്റെ പശ്ചാത്തലത്തിലാണ് പത്തനംതിട്ട മണ്ഡലം ഇത്തവണ ശ്രദ്ധാകേന്ദ്രമായത്. ശബരിമല വിഷയത്തില്‍ വര്‍ഗീയ ധ്രുവീകരണം നടത്തി രാഷ്ട്രീയനേട്ടം കൊയ്യാമെന്നും പത്തനംതിട്ട മണ്ഡലം പിടിച്ചടക്കാമെന്നുമുള്ള വിശ്വാസത്തിലാണ് ശബരിമല സമരത്തില്‍ സജീവമായിരുന്ന കെ. സുരേന്ദ്രനെ എന്‍.ഡി.എ ഇറക്കിയത്. മണ്ഡലം കൈവിടാതിരിക്കാനുള്ള പരമാവധി പ്രവര്‍ത്തനങ്ങള്‍ യു.ഡി.എഫും കാഴ്ചവച്ചിട്ടുണ്ട്.

ശബരിമല വിഷയത്തിലെ സര്‍ക്കാര്‍ നിലപാടിനുള്ള അംഗീകാരമാണ് പത്തനംതിട്ട മണ്ഡലത്തിലെ ജനസമ്മതിയെന്ന് വരുത്തിത്തീര്‍ക്കേണ്ട ബാധ്യത എല്‍.ഡി.എഫിനുമുണ്ട്. അതിനാല്‍ എന്തുവിലകൊടുത്തും വീണാജോര്‍ജിനെ ജയിപ്പിക്കാനുള്ള എല്ലാ പ്രവര്‍ത്തനങ്ങളും എല്‍.ഡി.എഫും നടത്തിയിട്ടുണ്ട്. ഈ രണ്ടു മണ്ഡലങ്ങളിലും നിലവിലെ വോട്ടുകള്‍ കുറയുന്നത് എല്‍.ഡി.എഫ്, യു.ഡി.എഫ് മുന്നണികള്‍ക്ക് ദോഷം ചെയ്യും. അതേസമയം, വിജയസാധ്യത ഏറ്റവും കൂടുതലെന്ന് ബി.ജെ.പി കരുതുന്ന ഈ മണ്ഡലങ്ങളില്‍ വിജയിക്കേണ്ടത് അവര്‍ക്കും അത്യാവശ്യമാണ്.