നെടുമ്പാശേരി: അന്താരാഷ്ട്ര വിമാനത്താവളത്തില്‍ നിന്നുള്ള യാത്രക്കാര്‍ക്ക് സഹായകമായി കൊച്ചിന്‍ ഇന്റര്‍നാഷണല്‍ എയര്‍പോര്‍ട്ട് ലിമിറ്റഡ് (സിയാല്‍) മൊബൈല്‍ ആപ്പ് പുറത്തിറക്കി. 'കൊച്ചിന്‍ എയര്‍പോര്‍ട്' എന്ന് പേരുള്ള ആപ്ലിക്കേഷന്‍ ആന്‍ഡ്രോയ്ഡ്, ഐ.ഒ.എസ് പ്ലാറ്റ്‌ഫോമുകളില്‍ ലഭ്യമാണ്. ഗൂഗിള്‍ പ്ലേസ്‌റ്റോര്‍, ആപ്പ് സ്റ്റോര്‍ എന്നിവയിലൂടെ സൗജന്യമായി മൊബൈല്‍ ഫോണുകളില്‍ ആപ്പ് ഡൗണ്‍ലോഡ് ചെയ്യാം.വിമാനത്താവളവുമായി ബന്ധപ്പെട്ട വിവരങ്ങള്‍ വിരല്‍ത്തുമ്പില്‍ ലഭ്യമാക്കാന്‍ ലക്ഷ്യമിട്ട് തയാറാക്കപ്പെട്ടിട്ടുള്ള ആപ്പില്‍ വിവരങ്ങളുടെ വിശാലമായ ശേഖരമുണ്ട്. അതോടൊപ്പം അന്താരാഷ്ട്ര, അഭ്യന്തര ടെര്‍മിനലുകള്‍ക്കുള്ളില്‍ വഴികാട്ടിയായും ആപ് ഉപയോഗിക്കാം. വിമാനങ്ങളുടെ കൃത്യമായ സമയപട്ടിക, കാലാവസ്ഥ, ഗേറ്റ് മാറ്റവുമായ ബന്ധപ്പെട്ട് അറിയിപ്പുകള്‍, ബാഗേജ് ലഭ്യമാകുന്ന ഇടം, പാര്‍ക്കിങ് സൗകര്യം, എ.ടിഎം, കടകള്‍, ഫോണ്‍ ചാര്‍ജിങ് പോയിന്റുകള്‍, ഫാര്‍മസി, ശുചിമുറികള്‍, സ്‌മോകിങ് റൂമുകള്‍, എയര്‍ലൈന്‍ ഓഫിസുകള്‍, ഇമഗ്രേഷന്‍ ഓഫിസുകള്‍ തുടങ്ങിയവയിലേയ്ക്ക് എത്താന്‍ ആപ്പ് യാത്രക്കാരെ സഹായിക്കുന്നു.