തേഞ്ഞിപ്പലം: സിവില്‍ സര്‍വിസ് പരീക്ഷയില്‍ ഉന്നത വിജയം നേടിയ ഗോത്ര വര്‍ഗ വിദ്യാര്‍ഥിനി ശ്രീധന്യ സുരേഷിന് വീട് നിര്‍മിച്ചു നല്‍കാന്‍ കാലിക്കറ്റ് സര്‍വകലാശാലാ ഓപ്പണ്‍ യൂനിറ്റ് തീരുമാനിച്ചു.
വയനാട്ടിലെ ശ്രീധന്യയുടെ ഭൂമിയിലാണ് വീട് നിര്‍മ്മിക്കുന്നത്. വീട് നിര്‍മിക്കാന്‍ ഉദേശിക്കുന്ന സ്ഥലം കാലിക്കറ്റ് സര്‍വകലാശാലാ വൈസ് ചാന്‍സലര്‍ ഡോ.കെ മുഹമ്മദ് ബഷീര്‍, പ്രോ-വൈസ് ചാന്‍സലര്‍ ഡോ.പി മോഹന്‍, ഐ.ടി.എസ്.ആര്‍ ഡയറക്ടര്‍ ഡോ.ഇ പുഷ്പലത എന്നിവര്‍ കഴിഞ്ഞ ദിവസം സന്ദര്‍ശിച്ചിരുന്നു. വീട് നിര്‍മ്മാണത്തിനായി ഡോ.ഇ ശ്രീകുമാരന്‍ ചെയര്‍മാനായും ബേബി ഷബീല കണ്‍വീനറായും രാജേഷ് ട്രഷററായുമുള്ള കമ്മറ്റി രൂപീകരിച്ചു.
സര്‍വകലാശാലാ ജീവനക്കാരില്‍ നിന്നും അധ്യാപകരില്‍ നിന്നുമാണ് ഇതിന് വേണ്ടിയുള്ള ഫണ്ട്
സ്വരൂപിക്കാനുദ്ധേശിക്കുന്നത്. കാലിക്കറ്റ് സര്‍വകലാശാലാ സുവോളജി പഠന വകുപ്പിലെ പൂര്‍വ വിദ്യാര്‍ഥിനിയാണ് ശ്രീധന്യ.