പാറ്റ്‌ന: ബിഹാറില്‍ നിയമസഭാ തെരഞ്ഞെടുപ്പ് അടുത്തിരിക്കവേ ഹിന്ദുസ്ഥാനി അവാം മോര്‍ച്ച (സെക്യുലര്‍) പാര്‍ട്ടിയെ എന്‍.ഡി.എ സഖ്യത്തിലേക്കു ക്ഷണിച്ച് ബി.ജെ.പി. ആര്‍.ജെ.ഡി സഖ്യത്തിലുണ്ടായിരുന്ന ജിതന്‍ റാം മാഞ്ചിയുടെ ഹിന്ദുസ്ഥാനി അവാം മോര്‍ച്ച ദിവസങ്ങള്‍ക്കു മുന്‍പാണ് മുന്നണി വിടുന്നതായി പ്രഖ്യാപിച്ചിരുന്നത്. ഇദ്ദേഹത്തിന്റെ പാര്‍ട്ടി എന്‍.ഡി.എയില്‍ ചേരുമെന്ന സൂചനകള്‍ക്കു പിന്നാലെയാണ് ബി.ജെ.പിയുടെ ക്ഷണം.

ബി.ജെ.പിയുടെ ബിഹാര്‍ സംസ്ഥാന അധ്യക്ഷന്‍ സഞ്ജയ് ജയ്‌സ്വാളാണ് മാഞ്ചിയേയും പാര്‍ട്ടിയേയും പരോക്ഷമായി മുന്നണിയിലേക്കു ക്ഷണിച്ചത്. നരേന്ദ്രമോദിയുടെ നേതൃത്വം അംഗീകരിക്കുന്ന ആര്‍ക്കും മുന്നണിയിലേക്കു സ്വാഗതമെന്നായിരുന്നു ഇതുസംബന്ധിച്ച ചോദ്യത്തിന് അദ്ദേഹത്തിന്റെ പ്രതികരണം. നേരത്തെ, ബിഹാര്‍ മുഖ്യമന്ത്രിയും ജെ.ഡി.യു നേതാവുമായി നിതീഷ് കുമാറുമായി ജിതന്‍ റാം മാഞ്ചി കൂടിക്കാഴ്ച നടത്തിയതായി വാര്‍ത്ത പുറത്തുവന്നിരുന്നു.

കോണ്‍ഗ്രസിന്റെയും ആര്‍.ജെ.ഡിയുടെയും നേതൃത്വത്തിലുള്ള മുന്നണിയില്‍ തങ്ങള്‍ക്ക് അര്‍ഹമായ പരിഗണന ലഭിക്കുന്നില്ലെന്ന് ആരോപിച്ചായിരുന്നു മാഞ്ചി മുന്നണി വിട്ടത്. ലാലുപ്രസാദ് യാദവിന്റെ മകനും ആര്‍.ജെ.ഡി നേതാവുമായ തേജസ്വി യാദവ് ഏകപക്ഷീയമായി തീരുമാനമെടുക്കുന്നുവെന്നും സീറ്റ് വിഭജനം ചര്‍ച്ച ചെയ്യാന്‍ സമിതിയെ വയ്ക്കാമെന്ന് രാഹുല്‍ ഗാന്ധി നല്‍കിയ ഉറപ്പ് പാലിക്കപ്പെട്ടില്ലെന്നും അദ്ദേഹം ആരോപിച്ചിരുന്നു.