മുംബൈ: മുംബൈ സിറ്റി ഡിഫന്‍ഡര്‍ ജോയ്‌നര്‍ ലൊറന്‍സോ അടുത്ത സീസണ്‍ മുതല്‍ ജംഷഡ്പുര്‍ എഫ്. സിയില്‍ കളിക്കും. വന്‍ തുക നല്‍കിയാണ് മുംബൈ നിരയില്‍ നിന്ന് താരത്തെ ജംഷഡ്പുര്‍ ടീമിലെത്തിച്ചത്. 70 ലക്ഷത്തിന് മുകളില്‍ തുകയാണ് ജംഷഡ്പുര്‍ താരത്തിന് വേണ്ടി ചെലവഴിച്ചിട്ടുള്ളത്.
ഈ കഴിഞ്ഞ സീസണില്‍ മുംബൈ സിറ്റിക്കായി നടത്തിയ തകര്‍പ്പന്‍ പ്രകടനങ്ങളാണ് ജൊയ്‌നറിന് വന്‍തുക ലഭിക്കാന്‍ കാരണമായതും ജംഷഡ്പുരിലേക്കുള്ള വഴി തെളിഞ്ഞതും. കഴിഞ്ഞ സീസണില്‍ 10 തവണ മുംബൈ ഡിഫന്‍സില്‍ ജോയ്‌നര്‍ ഇറങ്ങിയിരുന്നു.
നേരത്തെ ബെംഗളൂരു എഫ്.സിക്ക് വേണ്ടിയും താരം ബൂട്ട് കെട്ടിയിട്ടുണ്ട്. കഴിഞ്ഞ സീസണിലായിരുന്നു 28 കാരനായ ജോയ്‌നര്‍ മുംബൈ സിറ്റിയില്‍ എത്തിയത്. ഗോവന്‍ ക്ലബുകളായ ഡെമ്പോ, സ്‌പോര്‍ടിങ് ഗോവ തുടങ്ങിയ ടീമുകള്‍ക്കായും ജോയ്‌നര്‍ കളിച്ചിട്ടുണ്ട്.