കോഴിക്കോട്: കെ.എസ്.ആര്‍.ടി.സി ഡിപ്പോകളിലെ ഇന്ധന ക്ഷാമത്തിന് താല്‍ക്കാലിക പരിഹാരം. ഇന്ധന വിതരണം ചെയ്ത വകയില്‍ കുടിശികയായതില്‍ പകുതി തുക നല്‍കാമെന്ന് ഗതാഗതവകുപ്പ് മന്ത്രി ഐ.ഒ.സി അധികൃതര്‍ക്ക് ഉറപ്പു നല്‍കിയതോടെയാണ് വിവിധ കേന്ദ്രങ്ങളില്‍ നിന്നുള്ള ഇന്ധനീക്കം പുനരാരംഭിച്ചത്.
ഡീസല്‍ ക്ഷാമത്തെ തുടര്‍ന്ന് തിങ്കളാഴ്ച കോഴിക്കോട് മാത്രം 62 സര്‍വിസുകളായിരുന്നു കെ.എസ്.ആര്‍.ടി.സി റദ്ദാക്കിയിരുന്നത്. മുന്നറിയിപ്പുകളില്ലാതെ സര്‍വിസുകള്‍ നിര്‍ത്തി വച്ചത് യാത്രക്കാര്‍ക്ക് തിരിച്ചടിയായിരുന്നു. ഇതോടെ ടിക്കറ്റ് നിരക്ക് കുത്തനെ കൂട്ടി സ്വകാര്യ ബസുകള്‍ യാത്രക്കാരെ ചൂഷണം ചെയ്തിരുന്നു. 30 ലധികം സര്‍വിസ് റദ്ദാക്കേണ്ടി വന്നത് കോഴിക്കോട്, തൊട്ടില്‍പാലം മേഖലയിലായിരുന്നു.
ഇന്ധനക്ഷാമം പരിഹരിച്ചു തുടങ്ങിയതോടെ തൊട്ടില്‍പാലം മേഖലയിലേക്ക് 20 സര്‍വിസ് കൂടി പുനരാരംഭിച്ചു. നിലവില്‍ ജില്ലയില്‍ രണ്ടു ദിവസങ്ങളിലായി മുടങ്ങിയ 62 സര്‍വിസുകളില്‍ 48 എണ്ണം പുനസ്ഥാപിച്ചു. മറ്റു സര്‍വിസുകളും വൈകീട്ടോടെ പുനഃസ്ഥാപിക്കാന്‍ നടപടിയെടുത്തിരുന്നു.
കഴിഞ്ഞ ദിവസം രാത്രിയോടെ 20,000 ലിറ്റര്‍ ഡീസല്‍ എത്തിച്ചിരുന്നു. ചൊവ്വാഴ്ച രാത്രിയോടെ വീണ്ടും പുതിയ ലോഡ് എത്തിച്ചേരുന്നതോടെ നിലവിലുള്ള ഡീസല്‍ പ്രതിസന്ധി പരിഹരിക്കുമെന്ന് ബന്ധപ്പെട്ടവര്‍ അറിയിച്ചിട്ടുണ്ട്.