ന്യൂഡല്‍ഹി: തമിഴ്‌നാട് മുന്‍ മുഖ്യമന്ത്രി ജയലളിതയുടെ മരണവുമായി ബന്ധപ്പെട്ടുള്ള ജുഡിഷ്യല്‍ അന്വേഷണത്തിന് സുപ്രിംകോടതി സ്റ്റേ. അപ്പോളോ ആശുപത്രി നല്‍കിയ ഹരജിയിലാണ് ചീഫ് ജസ്റ്റിസ് അധ്യക്ഷനായ ബെഞ്ച് അന്വേഷണം സ്റ്റേ ചെയ്തത്. അപ്പോളോ ആശുപത്രിയില്‍ വച്ചാണ് ജയലളിത മരിച്ചത്. ജയലളിതയെ ആശുപത്രിയില്‍ പ്രവേശിക്കപ്പെട്ടതിന്റെയും 2016 ഡിസംബര്‍ അഞ്ചിന് അവര്‍ മരിച്ചതിന്റെയും പിന്നിലെ കാരണങ്ങളാണ് കമ്മിഷന്‍ അന്വേഷിക്കുന്നത്. തമിഴ്‌നാട് സര്‍ക്കാര്‍ നിയോഗിച്ച റിട്ട. ജസ്റ്റിസ് എ. അറുമുഖസാമിയുടെ നേതൃത്വത്തില്‍ 2017 സെപ്റ്റംബര്‍ മുതലാണ് അന്വേഷണം ആരംഭിച്ചത്. അന്വേഷണം 90 ശതമാനം പൂര്‍ത്തീകരിച്ചെന്നും അതിനാല്‍ സ്റ്റേ അനുവദിക്കരുതെന്ന് തമിഴ്‌നാട് സര്‍ക്കാര്‍ സുപ്രിംകോടതിയില്‍ ആവശ്യപ്പെട്ടെങ്കിലും കോടതി അംഗീകരിച്ചില്ല.