തിരുവനന്തപുരം: പ്രളയക്കെടുതിയില്‍പ്പെട്ട് തെരുവിലേക്കിറങ്ങേണ്ടിവന്നവരെ സംരക്ഷിക്കുമെന്ന് മുഖ്യമന്ത്രി പിണറായി വിജയന്‍ വാര്‍ത്താസമ്മേളനത്തില്‍ പറഞ്ഞു. ഇവര്‍ക്ക് വീട് നിര്‍മിക്കാന്‍ സ്‌പോണ്‍സര്‍മാരെ കണ്ടെത്തണമെന്നും ജില്ലാ കലക്ടര്‍മാര്‍ക്ക് നിര്‍ദേശം നല്‍കി. വീടുകളിലേക്കു തിരിച്ചുപോകുന്നവര്‍ക്ക് പ്രാഥമിക സൗകര്യങ്ങള്‍ക്കായുള്ള സഹായങ്ങള്‍ സമാഹരിച്ച് നഷ്ടപ്പെട്ട കുടുംബങ്ങള്‍ക്ക് ലഭ്യമാക്കും.
അവധികഴിഞ്ഞ് ബാങ്കുകള്‍ ഇന്ന് പ്രവര്‍ത്തനം ആരംഭിക്കുമ്പോള്‍ കാലതാമസം വരാതെ 10,000 രൂപ ധനസഹായം ലഭ്യമാക്കിയെന്ന് ഉറപ്പാക്കണമെന്ന് കലക്ടര്‍മാര്‍ക്ക് നിര്‍ദേശം നല്‍കിയിട്ടുണ്ടെന്നും വാഹനങ്ങളുടെയും ഗൃഹോപകരണങ്ങളുടെയും മറ്റും ഇന്‍ഷുറന്‍സ് തുക വേഗം ലഭ്യമാക്കുന്നതിന് ചീഫ് സെക്രട്ടറി തലത്തില്‍ വീണ്ടും യോഗം വിളിച്ചുചേര്‍ക്കുന്നതിനുള്ള തീരുമാനമെടുത്തുവെന്നും മുഖ്യമന്ത്രി പറഞ്ഞു.
മാലിന്യനിര്‍മാര്‍ജ്ജനത്തിന് പ്രത്യേക ശ്രദ്ധയുണ്ടാവണമെന്ന് തദ്ദേശ സ്ഥാപനങ്ങള്‍ക്ക് നിര്‍ദേശം നല്‍കിയതായും മാലിന്യങ്ങള്‍ കായലിലേക്കും പുഴയിലേക്കും ഒഴുക്കുന്നത് ഒഴിവാക്കണമെന്നും ഇത്തരം നടപടികള്‍ സ്വീകരിക്കുന്നവര്‍ക്കെതിരേ നിയമനടപടികള്‍ സ്വീകരിക്കുമെന്നും മുഖ്യമന്ത്രി പറഞ്ഞു.
വീട് പൂര്‍ണമായും തകര്‍ന്നവര്‍ക്ക് അതത് പ്രദേശങ്ങളില്‍ താമസ സൗകര്യമുണ്ടാക്കുന്നതിന് ശ്രദ്ധിക്കണമെന്നും കല്യാണമണ്ഡപങ്ങളും പൊതുഹാളുകളും ആള്‍താമസമില്ലാത്ത വലിയ വീടുകളും ഇതിനായി ലഭിക്കാന്‍ പരിശ്രമിക്കണമെന്നും കലക്ടര്‍മാര്‍ക്ക് നിര്‍ദേശം നല്‍കി. കന്നുകാലികള്‍ക്ക് തീറ്റയെത്തിക്കുന്നതിന് ശ്രദ്ധിക്കാന്‍ മൃഗസംരക്ഷണ വകുപ്പ് ഉദ്യോഗസ്ഥര്‍ക്ക് നിര്‍ദേശം നല്‍കി.
രോഗം ബാധിച്ചവര്‍ക്ക് ചികിത്സ ലഭ്യമാക്കണമെന്നും പ്രളയജലത്തില്‍ ഇറങ്ങിയവര്‍ എല്ലാവരും ടെറ്റനസ് കുത്തിവയ്‌പെടുക്കണമെന്നും മുഖ്യമന്ത്രി പറഞ്ഞു.
പൊതുവിതരണ സംവിധാനം ശക്തിപ്പെടുത്താന്‍ സിവില്‍ സപ്ലൈസിന്റെയും കണ്‍സ്യൂമര്‍ ഫെഡിന്റെയും ഷോപ്പുകള്‍ ആരംഭിക്കുമെന്നും മുഖ്യമന്ത്രി പറഞ്ഞു.