ലഖ്‌നൗ: ബി.ജെ.പി വീണ്ടും അധികാരത്തില്‍ വരുന്നത് തടയാന്‍ കോണ്‍ഗ്രസിന് കഴിയില്ലെന്ന് സമാജ് വാദി പാര്‍ട്ടി അധ്യക്ഷന്‍ അഖിലേഷ് യാദവ്. ദേശീയ താല്‍പര്യം മുന്‍നിര്‍ത്തിയാണ് എസ്.പിയും ബി.എസ്.പിയും സഖ്യം ചേര്‍ന്നതെന്നും അദ്ദേഹം കൂട്ടിച്ചേര്‍ത്തു.
തെരഞ്ഞെടുപ്പില്‍ തങ്ങള്‍ സഖ്യം ചേര്‍ന്നതിന്റെ ലക്ഷ്യം വളരെ വ്യക്തമാണ്. വര്‍ഗീയ പാര്‍ട്ടികളെ അധികാരത്തില്‍ നിന്ന് പുറത്തുനിര്‍ത്തുകയെന്നതിനുവേണ്ടിയാണ് യു.പിയില്‍ ബി.എസ്.പി, ആര്‍.എല്‍.ഡി എന്നിവരുമായി എസ്.പി സഖ്യം സ്ഥാപിച്ചത്. അതുകൊണ്ടുതന്നെ സീറ്റ് പങ്കുവയ്ക്കുന്നതില്‍ ഒരുപാട് വിട്ടുവീഴ്ചകള്‍ തങ്ങള്‍ നടത്തിയെന്നും അഖിലേഷ് കൂട്ടിച്ചേര്‍ത്തു.
2022ല്‍ യു.പിയില്‍ അധികാരത്തില്‍ തിരിച്ചെത്തുന്നതിനുവേണ്ടിയുള്ള പ്രവര്‍ത്തനങ്ങളും തങ്ങള്‍ തുടങ്ങിയിട്ടുണ്ട്. കേന്ദ്രത്തില്‍ അധികാരത്തില്‍ തിരിച്ചെത്താമെന്നും അതിനുശേഷം യു.പിയില്‍ ഭരണം പിടിക്കാമെന്നുമാണ് കോണ്‍ഗ്രസ് ലക്ഷ്യം വയ്ക്കുന്നത്. എന്നാല്‍ ബി.ജെ.പിയുടെ നീക്കത്തെ തടയിടാന്‍ അവര്‍ക്ക് കഴിയില്ലെന്നത് വ്യക്തമാണെന്നും അഖിലേഷ് യാദവ് പറഞ്ഞു.