തിരൂരങ്ങാടി: ലോകത്തെ വിവിധ രാജ്യങ്ങളില്‍ നിന്നുള്ള മുസ്‌ലിം പണ്ഡിതര്‍ക്കും ഇമാമുമാര്‍ക്കും പ്രാസംഗികര്‍ക്കുമായി ഈജിപ്തിലെ അല്‍അസ്ഹര്‍ ഇസ്‌ലാമിക് സര്‍വകലാശാല നടത്തുന്ന ദ്വിമാസ രാജ്യാന്തര ദഅ്‌വാ പരിശീലന കോഴ്‌സില്‍ ഇത്തവണ ദാറുല്‍ഹുദാ ഇസ്‌ലാമിക് സര്‍വകലാശാലയെ പ്രതിനിധീകരിച്ച് ഏഴ് ഹുദവികള്‍ പങ്കെടുക്കും.
സര്‍വകലാശാലയിലെ കര്‍മശാസ്ത്ര പഠനവിഭാഗം മേധാവി ഡോ. ജഅ്ഫര്‍ ഹുദവി കൊളത്തൂര്‍, നാഷനല്‍ ഇന്‍സ്റ്റിറ്റ്യൂട്ട് ഡയറക്ടര്‍ വി.ടി റഫീഖ് ഹുദവി കടുങ്ങല്ലൂര്‍, ഡല്‍ഹി ജവഹര്‍ലാല്‍ നെഹ്‌റു യൂനിവേഴ്‌സിറ്റി ഗവേഷക വിദ്യാര്‍ഥി അബ്ദുര്‍റസാഖ് ഹുദവി മൂര്‍ക്കനാട്, ദാറുല്‍ഹുദാ ബിരുദ വിഭാഗം ലക്ചറര്‍ നൗഫല്‍ ഹുദവി മേലാറ്റൂര്‍, യു.ജി സ്ഥാപനമായ പാണ്ടിക്കാട് ദാറുല്‍ ഇര്‍ഫാന്‍ അക്കാദമി അധ്യാപകന്‍ അബ്ദുന്നാസിര്‍ ഹുദവി പയ്യനാട്, മാണൂര്‍ ദാറുല്‍ഹിദായ കോളജ് അധ്യാപകന്‍ ജസീല്‍ ഹുദവി കാവഞ്ചേരി, താനൂര്‍ ഇസ്‌ലാഹുല്‍ ഉലൂം അധ്യാപകന്‍ അബ്ദുസ്സലാം ഹുദവി മമ്പുറം എന്നിവരാണ് ദാറുല്‍ഹുദാ പ്രതിനിധികള്‍.
സെപ്റ്റംബര്‍ ഒന്ന് മുതല്‍ ഒക്ടോബര്‍ 31 വരെ കൈറോയിലെ അല്‍അസ്ഹര്‍ കാംപസിലാണ് പരിശീലനം നടക്കുന്നത്.
മുന്‍പും പലതവണ ദാറുല്‍ഹുദാ പ്രതിനിധികള്‍ കോഴ്‌സില്‍ സംബന്ധിച്ചിരുന്നു. ഈജിപ്തിലേക്ക് പുറപ്പെട്ട ദാറുല്‍ഹുദാ പ്രതിനിധികള്‍ക്ക് സര്‍വകലാശാല അധികൃതരും പൂര്‍വവിദ്യാര്‍ഥി സംഘടന ഹാദിയയും ചേര്‍ന്ന് യാത്രയയപ്പ് നല്‍കി. സംഗമം വി.സി ഡോ. ബഹാഉദ്ദീന്‍ മുഹമ്മദ് നദ്‌വി ഉദ്ഘാടനം ചെയ്തു.