കോഴിക്കോട്: സര്‍ക്കാര്‍ ഓണത്തിനോട് അനുബന്ധിച്ച് വിതരണം ചെയ്ത ഭക്ഷ്യ സാധനങ്ങള്‍ നിലവാരം കുറഞ്ഞതാണെന്ന പരാതി പല കോണുകളില്‍ നിന്നും ഉയരുകയാണ്. ഏറ്റവുമധികം പരാതി ഉയരുന്നത് സര്‍ക്കരയെ കുറിച്ചു തന്നെയാണ്. പലര്‍ക്കും ലഭിക്കുന്നത് ഭക്ഷ്യ യോഗ്യമല്ലാത്ത സര്‍ക്കരയാണ്. കിറ്റിലുള്ള മറ്റു ഉല്‍പനങ്ങളെ കുറിച്ചും വ്യാപകമായി പരാതി ഉയരുന്നുണ്ട്. കോഴിക്കോട് ജില്ലയിലെ അഞഉ 198 കരണ്ടോട് റേഷന്‍ ഷോപ്പില്‍ നിന്നും ലഭിച്ച സര്‍ക്കാരിന്റെ സൗജന്യ ഓണക്കിറ്റില്‍ ശര്‍ക്കരയോടൊപ്പം ഒരു ഗുണപോക്താവിന് ലഭിച്ചത് ബീഡിയാണ്. കിറ്റ് പൊട്ടിച്ചു സര്‍ക്കര എടുത്തപ്പോഴാണ് ബീഡി കണ്ടതെന്ന് കുളങ്ങരത്താഴ കുഞ്ഞബ്ദുല്ല സുപ്രഭാതത്തോട് പറഞ്ഞു. കഴിഞ്ഞ ദിവസമാണ് കിറ്റ് കിട്ടിയതെന്നും ഇന്ന് രാവിലെ പൊട്ടിച്ചപ്പോഴാണ് ബീഡി കണ്ടെതെന്നും ഞാന്‍ സൂക്ഷിച്ചു വെച്ചിട്ടുണ്ടെന്നും കുഞ്ഞബ്ദുല്ല പറയുന്നു. അധികൃതരുമായി ബന്ധപ്പെട്ടപ്പോള്‍ പുതിയത് മാറ്റിവാങ്ങാനുള്ള നിര്‍ദേശമാണ് ലഭിച്ചതെന്നും അദ്ദേഹം സുപ്രഭാതം ഓണ്‍ലൈനിനോട് പറഞ്ഞു. സര്‍ക്കര ഭക്ഷ്യയോഗ്യമല്ലെന്ന് അറിഞ്ഞതോടെ മിക്ക വീടുകളിലും ഇതു ഉപയോഗിക്കുന്നില്ല.